மதுரையில் இன்று செய்தியாளர்களைச் சந்தித்த அதிமுக முன்னாள் அமைச்சரும், அக்கட்சியின் முக்கிய நிர்வாகியுமான செல்லூர் ராஜூ, தமிழகத்தின் தற்போதைய அரசியல் சூழல் மற்றும் திருப்பரங்குன்றம் தீப விவகாரம் குறித்து திமுக அரசை மிகக் கடுமையான தொனியில் விமர்சித்தார். குறிப்பாக, திண்டுக்கல்லில் இருந்து மதுரை நோக்கிச் சென்றபோது முதலமைச்சர் மு.க. ஸ்டாலினின் கார் டயர் வெடித்து விபத்துக்குள்ளான சம்பவத்தை, திருப்பரங்குன்றம் முருகப் பெருமானின் சக்தியுடன் ஒப்பிட்டு அவர் பேசியது பெரும் பரபரப்பை ஏற்படுத்தியுள்ளது.
திருப்பரங்குன்றம் மலை உச்சியில் தீபம் ஏற்ற அனுமதி அளித்து நீதிமன்றம் உத்தரவிட்டும், அதனை நிறைவேற்ற அரசு முட்டுக்கட்டை போடுவதைச் சுட்டிக்காட்டிய செல்லூர் ராஜூ, “முருகப் பெருமானுக்கு சக்தி அதிகம். அவரைத் தொடர்ந்து விமர்சனம் செய்ததால்தான், திருப்பரங்குன்றம் அருகிலேயே முதலமைச்சரின் கார் டயர் பஞ்சராகிப் போனதோ என்று நினைக்கத் தோன்றுகிறது. தெய்வத்தை விமர்சிப்பவர்களுக்குத் தெய்வம் உரியப் பாடத்தைப் புகட்டும். திருப்பரங்குன்றம் விவகாரத்தில் நீதிமன்ற தீர்ப்பை திமுக அரசு மதிக்க வேண்டும். இரு சமூகங்களுக்கு இடையே மோதலை அரசே உருவாக்கப் பார்ப்பதாக நீதியரசர்களே சாடியுள்ளது இந்த ஆட்சிக்குக் கிடைத்த மிகப்பெரிய அவமானம்,” என்று தெரிவித்தார்.
திமுக கூட்டணியில் ஏற்பட்டுள்ள விரிசல்கள் குறித்துப் பேசிய அவர், காங்கிரஸ் நிர்வாகி பிரவீன் சக்கரவர்த்தியின் கருத்துகளை மேற்கோள் காட்டினார். “அறுபது ஆண்டுகளாக ஆட்சியில் இல்லாத காங்கிரஸ், இப்போது பங்கு கேட்பதில் என்ன தவறு என அவர்கள் கேட்கத் தொடங்கிவிட்டனர். திமுக வலுவாக இருந்தால் கூட்டணிக் கட்சிகள் இப்படிப் பேசுவார்களா? தனித்து நிற்கத் தயாரா என்று திமுகவிற்குச் சவால் விடுகிறேன். தமிழகத்தில் முதன்மையான கட்சி அதிமுக மட்டுமே. எடப்பாடி பழனிசாமி டெல்லி செல்வது தமிழக மக்களின் நலனுக்காகவும், மத்திய அரசு நிறைவேற்றியுள்ள 125 நாள் வேலைவாய்ப்புத் திட்டத்திற்கு நன்றி தெரிவிக்கவுமே தவிர, யாரோ சொல்வதைக் கேட்பதற்காக அல்ல,” என்று விளக்கமளித்தார்.
திமுகவின் கடந்த நான்கு ஆண்டுகால ஆட்சியில் ரூ. 4 லட்சம் கோடி அளவிற்கு முறைகேடுகள் நடந்துள்ளதாகக் குற்றம் சாட்டிய செல்லூர் ராஜூ, இது குறித்த மனுவை உள்துறை அமைச்சரிடம் வழங்கவே எடப்பாடி பழனிசாமி டெல்லி சென்றுள்ளதாகக் குறிப்பிட்டார். “ஸ்டாலின்தான் வாராரு என்ற பாடலை இப்போது எங்கும் கேட்க முடிவதில்லை; அத்தோடு திமுகவின் விடியலும் முடிந்துவிட்டது. விளம்பரங்களால் மட்டுமே ஓடிக்கொண்டிருக்கும் இந்த ஆட்சிக்கு எதிரான மக்கள் அலை மிகத்தீவிரமாக வீசுகிறது. எவ்வளவு பணம் கொடுத்தாலும் மக்கள் மனம் மாறப்போவதில்லை. ஜெயலலிதா அம்மையாரைப் போலத் தனித்து நின்று வெற்றி பெறும் தைரியம் ஸ்டாலினுக்கு இருக்கிறதா?” என அதிரடியாகக் கேள்வி எழுப்பினார்.
மதுரை ஆஸ்டின்பட்டி அருகே முதலமைச்சரின் கார் சுமார் 100 கி.மீ வேகத்தில் சென்றபோது டயர் வெடித்த சம்பவத்தில், நல்வாய்ப்பாக முதலமைச்சர் காயமின்றித் தப்பியது குறிப்பிடத்தக்கது. எனினும், இச்சம்பவத்தை ஆன்மீக ரீதியாகவும் அரசியல் ரீதியாகவும் இணைத்துப் பேசி செல்லூர் ராஜூ கிளப்பியுள்ள விவாதம், சமூக வலைதளங்களிலும் அரசியல் வட்டாரத்திலும் பேசுபொருளாக மாறியுள்ளது. நீதிமன்றத் தீர்ப்பைச் செயல்படுத்துவதில் நிலவும் இழுபறி மற்றும் கூட்டணியில் எழுந்துள்ள சலசலப்புகள் திமுக அரசுக்குத் தேர்தல் நெருங்கும் வேளையில் பெரும் சவாலாக உருவெடுத்துள்ளன.