ராமநாதபுரம் மாவட்டம் முதுகுளத்தூர் அருகே உள்ள சடையனேரி கிராமத்தில், ஆதிதிராவிடர் குடியிருப்பு பகுதியில் நிலவும் பொதுப்பாதை ஆக்கிரமிப்புகளை அகற்றக் கோரி கிராம மக்கள் இன்று வட்டாட்சியர் அலுவலகத்தை முற்றுகையிட்டு மனு அளித்தனர். இக்கிராமத்தின் ஆதிதிராவிடர் குடியிருப்பில் 60-க்கும் மேற்பட்ட குடும்பங்கள் பல தலைமுறைகளாக வசித்து வருகின்றனர். இப்பகுதியில் உள்ள பொதுப்பாதை, சில தனிநபர்களின் ஆக்கிரமிப்பால் மிகக் குறுகலாக மாறியுள்ளது. இதன் விளைவாக, அவசர காலங்களில் நோயாளிகளை அழைத்துச் செல்ல வரும் ஆம்புலன்ஸ் வாகனங்கள் கூட குடியிருப்பு பகுதிக்குள் நுழைய முடியாமல் வெளியிலேயே நிற்கும் அவல நிலை நீடிக்கிறது. மேலும், முறையான வடிகால் வசதியின்றி மழைக்காலங்களில் தெருக்களிலேயே தண்ணீர் தேங்கி நிற்பதால் சுகாதாரச் சீர்கேடும் ஏற்பட்டுள்ளது.
இந்த விவகாரம் குறித்து கிராமக் கூட்டத்தில் ஏற்கனவே விரிவான ஆலோசனைகள் நடத்தப்பட்டுள்ளன. அப்போது, பொதுநலன் கருதி தங்களது வீட்டின் முன்புள்ள ஆக்கிரமிப்புகளைத் தாங்களாகவே முன்வந்து அகற்றிக் கொள்வதாகப் பெரும்பான்மையான மக்கள் சம்மதம் தெரிவித்துள்ளனர். இருப்பினும், ஒரு சில நபர்கள் மட்டும் ஆக்கிரமிப்புகளை அகற்றத் தொடர்ந்து பிடிவாதம் காட்டி வருவதால், ஒட்டுமொத்த கிராமத்தின் வளர்ச்சியும், அவசர காலப் போக்குவரத்தும் முடங்கியுள்ளது. இது தொடர்பாகப் பலமுறை எடுத்துக் கூறியும் எவ்வித முன்னேற்றமும் ஏற்படாததால், கிராம மக்கள் அதிகாரிகளின் உதவியை நாடியுள்ளனர்.
சடையனேரி கிராமத் தலைவர் மாயகிருஷ்ணன் தலைமையில் திரண்ட 10-க்கும் மேற்பட்ட கிராம மக்கள், முதுகுளத்தூர் தாசில்தார் கோகுல்நாத்தைச் சந்தித்துப் புகார் மனுவை அளித்தனர். அந்த மனுவில், “பொதுப்பாதையில் உள்ள ஆக்கிரமிப்புகளை வருவாய்த்துறை அதிகாரிகள் மற்றும் காவல்துறை பாதுகாப்புடன் முறையாக அளவீடு செய்ய வேண்டும். ஆக்கிரமிப்புகளை அகற்றி, ஆம்புலன்ஸ் உள்ளிட்ட வாகனங்கள் தடையின்றிச் சென்று வரவும், மழைநீர் வடியவும் வழிவகை செய்ய வேண்டும்” என வலியுறுத்தியுள்ளனர். இந்த நிகழ்வின் போது கிராமச் செயலாளர் சுதாகர், பொருளாளர் சவுந்தரபாண்டி உள்ளிட்ட முக்கிய நிர்வாகிகள் மற்றும் பொதுமக்கள் உடனிருந்தனர். மனுவைப் பெற்றுக்கொண்ட வட்டாட்சியர், இது குறித்து உரிய விசாரணை நடத்தி விரைவில் நடவடிக்கை எடுப்பதாக உறுதி அளித்துள்ளார்.
