கோவை மாநகரின் மிக முக்கியமான குடியிருப்புப் பகுதியான நஞ்சுண்டாபுரத்தில், பட்டப்பகலில் மூதாட்டி ஒருவர் கை, கால்கள் கட்டப்பட்ட நிலையில் படுகொலை செய்யப்பட்ட சம்பவம் ஒட்டுமொத்த மாவட்டத்தையும் அதிரவைத்துள்ளது. நஞ்சுண்டாபுரம் பகுதியைச் சேர்ந்தவர் கஸ்தூரி (82). இவரது கணவர் குட்டி ஏற்கனவே மறைந்துவிட்ட நிலையில், கஸ்தூரிக்கு ராம்குட்டி என்ற மகனும், இரண்டு மகள்களும் உள்ளனர். மகன் ராம்குட்டி கோவையின் பிச்சனூர் பகுதியில் புகழ்பெற்ற மருத்துவமனை நடத்தி வரும் மருத்துவர் ஆவார். பிள்ளைகள் அனைவருக்கும் திருமணமாகி அருகருகே வசித்து வந்த போதிலும், கஸ்தூரி மட்டும் தனது வீட்டில் தனியாக வசித்து வந்தார். அவருக்கு உதவியாக நேபாளத்தைச் சேர்ந்த பெண் ஒருவர் கடந்த சில நாட்களாகப் பணியமர்த்தப்பட்டிருந்தார்.
வழக்கம்போல் இன்று காலை டி.வி.எஸ். நகரில் வசிக்கும் கஸ்தூரியின் மகள் தனது தாய்க்குத் தொலைபேசியில் அழைத்துள்ளார். நீண்ட நேரமாகியும் அழைப்பு ஏற்கப்படாததால் சந்தேகமடைந்த அவர், வீட்டின் அருகே வசிக்கும் ஒரு பெண்ணைத் தொடர்புகொண்டு நேரில் சென்று பார்க்குமாறு கூறியுள்ளார். அந்தப் பெண் கஸ்தூரியின் வீட்டிற்குச் சென்றபோது, வீட்டின் கதவு திறந்திருப்பதைக் கண்டு அதிர்ச்சியடைந்தார். உள்ளே சென்று பார்த்தபோது, கை மற்றும் கால்கள் துணியால் கட்டப்பட்ட நிலையில் கஸ்தூரி சடலமாகக் கிடப்பதைக் கண்டு அலறினார். உடனடியாகத் தகவல் தெரிவிக்கப்பட்டதையடுத்து, ராமநாதபுரம் போலீசார் மற்றும் உயர்மட்ட அதிகாரிகள் சம்பவ இடத்திற்கு விரைந்தனர்.
துணை கமிஷனர் கார்த்திகேயன், உதவி கமிஷனர் வசந்தராஜ் மற்றும் ராமநாதபுரம் இன்ஸ்பெக்டர் தலைமையிலான தனிப்படை போலீசார் தீவிர விசாரணையில் இறங்கினர். முதற்கட்ட ஆய்வில், கஸ்தூரியின் கழுத்தில் இருந்த சங்கிலி மற்றும் காது கம்மல் அப்படியே இருந்த நிலையில், அவர் அணிந்திருந்த 2 பவுன் தங்கச் செயின் மட்டும் மாயமாகி இருப்பது தெரியவந்தது. இதனால் நகைக்காகவே இந்தத் திட்டமிட்ட படுகொலை அரங்கேறியிருப்பது உறுதி செய்யப்பட்டுள்ளது. சம்பவ இடத்திற்கு வரவழைக்கப்பட்ட மோப்பநாய் வீட்டில் இருந்து சிறிது தூரம் ஓடி நின்றது. கைரேகை நிபுணர்கள் வீட்டில் பதிவாகியிருந்த முக்கியத் தடயங்களைச் சேகரித்தனர்.
இந்தக் கொலை வழக்கில் திடீர் திருப்பமாக, கஸ்தூரியைப் பார்த்துக்கொள்ள நியமிக்கப்பட்ட நேபாளப் பெண் இன்று காலை முதல் வேலைக்கு வராமல் தலைமறைவாகி இருப்பது போலீசாருக்கு அவர் மீது பலத்த சந்தேகத்தை ஏற்படுத்தியுள்ளது. வெளிமாநிலத்தைச் சேர்ந்தவர்கள் இது போன்ற குற்றச் செயல்களில் ஈடுபடுவது சமீபகாலமாக அதிகரித்து வரும் நிலையில், அந்தப் பெண்ணைப் பிடிக்கப் போலீசார் தனிப்படை அமைத்துத் தீவிரமாகத் தேடி வருகின்றனர். குடியிருப்பில் உள்ள சிசிடிவி கேமரா காட்சிகளை ஆய்வு செய்து வரும் போலீசார், கொலையாளிகள் யாராவது அதிகாலையில் வீட்டிற்குள் நுழைந்தார்களா என்பதையும் விசாரித்து வருகின்றனர். மூதாட்டியின் உடல் பிரேதப் பரிசோதனைக்காக அரசு மருத்துவமனைக்கு அனுப்பி வைக்கப்பட்டுள்ள நிலையில், இந்தச் சம்பவம் நஞ்சுண்டாபுரம் பகுதி மக்களிடையே பெரும் பீதியை ஏற்படுத்தியுள்ளது.
