உஸ்பெகிஸ்தானின் சமர்கண்ட் நகரில் நடைபெற்ற ஃபிடே கிராண்ட் சுவிஸ் செஸ் தொடரில், தமிழகத்தை சேர்ந்த கிராண்ட் மாஸ்டர் ஆர். வைஷாலி சாம்பியன் பட்டத்தை வென்று வரலாற்றுச் சாதனை படைத்துள்ளார்.
இறுதிச் சுற்றில் சீனாவின் டான் ஸோங்கி உடன் மோதிய வைஷாலி, மொத்தம் 11 சுற்றுகளில் 8 புள்ளிகள் பெற்று முதலிடம் பிடித்தார். இதன் மூலம் அடுத்த ஆண்டு நடைபெறவுள்ள கேன்டிடேட்ஸ் செஸ் தொடருக்கு நேரடியாக தகுதி பெற்றார்.
வைஷாலி, கேன்டிடேட்ஸ் தொடருக்குத் தேர்வாகும் மூன்றாவது இந்திய வீராங்கனை என்ற பெருமையையும் பெற்றுள்ளார். இதற்கு முன்பு திவ்யா தேஷ்முக், கோனேரு ஹம்பி ஆகியோர் தகுதி பெற்றிருந்தனர். மேலும், வைஷாலி இந்த கிராண்ட் சுவிஸ் பட்டத்தை வெல்வது இது இரண்டாவது முறை என்பதும் குறிப்பிடத்தக்கது.
வெற்றிக்குப் பிறகு பேசிய அவர், “சில மாதங்களுக்கு முன்பு தொடர் தோல்விகள் வருத்தமளித்தன. ஆனால் சமீபத்தில் என் விளையாட்டில் பல மாற்றங்கள் செய்தேன். சென்னை போட்டியில் பெற்ற அனுபவங்களே இங்கு வெற்றியளித்தன. கேன்டிடேட்ஸ் தொடருக்குத் தேர்வாகியிருப்பது பெரும் மகிழ்ச்சி” என்று தெரிவித்தார்.
இந்த வெற்றிக்கு பாராட்டு தெரிவித்த முதல்வர் மு.க. ஸ்டாலின் தனது சமூக வலைதள பதிவில், “சென்னையின் பெருமை வைஷாலி, சாம்பியன் பட்டம் வென்றது தனிப்பட்ட வெற்றியை மட்டும் அல்ல, தமிழ்நாட்டின் பெருமையையும் உலக அரங்கில் இளம் பெண்களின் கனவுகளையும் பிரதிபலிக்கிறது” எனக் குறிப்பிட்டார்.
பிரதமர் நரேந்திர மோடியும், “வைஷாலி ரமேஷ்பாபுவின் அர்ப்பணிப்பு மற்றும் ஆர்வம் மற்றவர்களுக்கு முன்மாதிரியாக உள்ளது. அவருக்கு மனமார்ந்த வாழ்த்துகள்” என்று தெரிவித்துள்ளார்.
