திருப்பூர் மாவட்டம் உடுமலைப்பேட்டை நகரில், நீதிமன்ற உத்தரவுகள் மற்றும் அரசின் தடையை மீறி, முக்கியச் சாலைகளிலும் பொது இடங்களிலும் நூற்றுக்கணக்கான பிளக்ஸ் பேனர்கள் வைக்கப்பட்டுள்ளதால், பொதுமக்களின் பாதுகாப்பு கேள்விக்குறியாகியுள்ளது. உடுமலையின் மையப்பகுதிகளான பேருந்து நிலையம், முக்கியச் சாலைச் சந்திப்புகள் மற்றும் வணிக வளாகங்கள் நிறைந்த பகுதிகளில் அரசியல் கட்சிகள் மற்றும் தனியார் வணிக நிறுவனங்கள் சார்பில் போட்டி போட்டுக்கொண்டு ராட்சத அளவிலான பேனர்கள் நிறுவப்பட்டுள்ளன. நகரின் பிரதான சாலைகளான பழனி ரோடு, பொள்ளாச்சி ரோடு, தாராபுரம் ரோடு, தளி ரோடு, திருப்பூர் ரோடு மற்றும் ராஜேந்திரா ரோடு ஆகிய பகுதிகளில் நடைபாதைகளையும் சாலை ஓரங்களையும் மறைத்து இந்த பேனர்கள் வைக்கப்பட்டுள்ளன.
குறிப்பாகத் தளி ரோடு சந்திப்பு, பேருந்து நிலையம் மற்றும் அனுஷம் ரோடு சந்திப்பு போன்ற போக்குவரத்து நெரிசல் மிகுந்த இடங்களில் வைக்கப்பட்டுள்ள பிரம்மாண்ட பேனர்கள், வாகன ஓட்டிகளின் கவனத்தை திசைதிருப்பி விபத்துகளுக்கு வழிவகுக்கின்றன. பொது இடங்களில் பிளக்ஸ் பேனர்கள் வைக்கக் கூடாது என உயர் நீதிமன்றம் கடுமையான உத்தரவுகளைப் பிறப்பித்துள்ள போதிலும், உடுமலையில் அந்த விதிகள் அனைத்தும் காற்றில் பறக்கவிடப்பட்டுள்ளன. பெரும்பாலான இடங்களில் பேருந்து நிறுத்தங்களையும், சாலையின் வளைவுகளையும் மறைத்து இவை வைக்கப்பட்டுள்ளதால், எதிரே வரும் வாகனங்கள் தெரியாமல் பாதசாரிகளும் ஓட்டுநர்களும் கடும் அவதிக்குள்ளாகி வருகின்றனர்.
தற்போது நிலவும் சீரற்ற காலநிலை மற்றும் பலத்த காற்றினால், பலவீனமான கட்டமைப்புடன் வைக்கப்பட்டுள்ள இந்த பேனர்கள் கிழிந்து சாலைகளில் விழுவதும், வாகன ஓட்டிகள் மீது சரிந்து விபத்துகளை ஏற்படுத்துவதும் தொடர்கதையாகி வருகிறது. உயிருக்கு ஆபத்தை விளைவிக்கும் இத்தகைய விதிமீறல்கள் குறித்துப் புகார் அளித்தும், நகராட்சி அதிகாரிகள், காவல்துறை மற்றும் நெடுஞ்சாலைத் துறையினர் மெத்தனமாக இருப்பதாகச் சமூக ஆர்வலர்கள் குற்றம் சாட்டுகின்றனர். ஒரு பெரும் அசம்பாவிதம் நடக்கும் வரை காத்திருக்காமல், உடனடியாகத் தலையிட்டு விதிமீறி வைக்கப்பட்டுள்ள அனைத்து பேனர்களையும் அகற்ற வேண்டும் என்றும், விதிகளை மீறுபவர்கள் மீது பாரபட்சமின்றி கடும் சட்ட நடவடிக்கை எடுக்க வேண்டும் என்றும் உடுமலை வாழ் பொதுமக்கள் கோரிக்கை விடுத்துள்ளனர்.