சுதந்திரப் போராட்ட வீரர் மாவீரன் வீரபாண்டிய கட்டபொம்மனின் 267-வது பிறந்த நாள் விழா, தேனி மாவட்டத்தின் பல்வேறு பகுதிகளில் இன்று எழுச்சியுடன் கொண்டாடப்பட்டது. போடியில் நாயுடு நாயக்கர் மத்திய சங்கம் சார்பில் நடைபெற்ற பிரம்மாண்ட விழாவிற்குச் சங்கத்தின் கௌரவத் தலைவர் குமரன் தலைமை தாங்கினார். தலைவர் வடமலை ராஜையபாண்டியன், செயலாளர் சுருளிராஜ் உள்ளிட்ட நிர்வாகிகள் முன்னிலையில் நடைபெற்ற இந்த விழாவில், பெண்களின் பக்தி மயமான முளைப்பாரி ஊர்வலம் பொதுமக்களின் கவனத்தை ஈர்த்தது. விழாவின் சிகர நிகழ்ச்சியாக, தமிழக முன்னாள் முதல்வர் ஓ. பன்னீர்செல்வம் கலந்துகொண்டு, போடி நகரில் அமைந்துள்ள வீரபாண்டிய கட்டபொம்மன் சிலைக்கு மலர் மாலை அணிவித்து வீரவணக்கம் செலுத்தினார்.
இந்த நிகழ்ச்சியில் அரசியல் எல்லைகளைக் கடந்து அனைத்துக் கட்சிப் பிரமுகர்களும் திரளாகப் பங்கேற்றுத் தங்களது மரியாதையைச் செலுத்தினர். அதிமுக உரிமை மீட்பு கழக மாவட்டச் செயலாளர் சையதுகான், திமுக சார்பில் தங்க தமிழ்ச்செல்வன் எம்.பி., மற்றும் காங்கிரஸ், பாஜக, அமமுக, இந்திய கம்யூனிஸ்ட் உள்ளிட்ட பல்வேறு கட்சிகளின் முக்கிய நிர்வாகிகள் கட்டபொம்மன் சிலைக்கு மாலை அணிவித்தனர். வீரபாண்டிய கட்டபொம்மன் பண்பாட்டுக் கழகத்தின் மாநில மற்றும் மாவட்ட நிர்வாகிகளும் பெருந்திரளாகக் கலந்து கொண்டனர். கட்டபொம்மனின் தியாகத்தையும், வீரத்தையும் நினைவு கூரும் வகையில் அமைந்த இந்த நிகழ்வு, போடி நகரையே விழாக்கோலம் காணச் செய்தது.
இதேபோல், ஆண்டிபட்டியிலும் கட்டபொம்மன் பிறந்த நாள் விழா கோலாகலமாகக் கொண்டாடப்பட்டது. ஆண்டிபட்டி மாலக்கோயில் சங்க வளாகத்தில் நடைபெற்ற இந்த நிகழ்ச்சிக்கு வீரபாண்டிய கட்டபொம்மன் பண்பாட்டுக் கழக மாவட்டச் செயலாளர் சக்திவேல் தலைமை தாங்கினார். மாவட்டத் தலைவர் லட்சுமணன், பொருளாளர் பவுன் கதிர்வேல்சாமி உள்ளிட்டோர் முன்னிலையில், அலங்கரித்து வைக்கப்பட்டிருந்த கட்டபொம்மனின் திருவுருவப் படத்திற்குப் பல்வேறு கட்சியினரும், சமூக ஆர்வலர்களும் மாலை அணிவித்து மரியாதை செலுத்தினர்.
தேனி மாவட்டம் முழுவதும் நடைபெற்ற இந்தப் பிறந்த நாள் விழாக்களில், கட்டபொம்மனின் வீர வரலாற்றைப் போற்றும் வகையில் உரையாற்றப்பட்டது. ஜாதி, மத வேறுபாடுகளைக் கடந்து நாட்டின் விடுதலைக்காகப் பாடுபட்ட ஒரு மாவீரனின் புகழை அடுத்த தலைமுறைக்குக் கொண்டு செல்லும் விதமாக இந்த ஆண்டு விழாக்கள் அமைந்திருந்தன. போடி மற்றும் ஆண்டிபட்டி பகுதிகளில் பாதுகாப்பு கருதி ஏராளமான போலீசார் குவிக்கப்பட்டிருந்தனர். அரசியல் தலைவர்களின் வருகையாலும், பொதுமக்களின் பங்கேற்பாலும் தேனி மாவட்டமே இன்று வீரபாண்டிய கட்டபொம்மன் நினைவலைகளில் மூழ்கியது.
