அதிபர் ட்ரம்ப் குறித்து அளவுமீறிய பதிவுகள் : வருத்தம் தெரிவித்த எலான் மஸ்க் !

வாஷிங்டன் :
அமெரிக்க அதிபராக இரண்டாவது முறையாக பதவி ஏற்கத் தயாராகும் டொனால்டு ட்ரம்புக்கு ஆதரவு தெரிவித்து, நிதியுதவியுடன் பிரசாரத்திலும் ஈடுபட்ட உலகின் முதன்மை பணக்காரர் எலான் மஸ்க், தற்போது புதிய சர்ச்சைகளில் சிக்கியுள்ளார்.

ட்ரம்பின் புதிய நிர்வாகத்தில், செலவுக்குறைப்புத் திட்டங்களை செயல்படுத்தும் “DOGE” துறைக்கு தலைமை ஆலோசகராக நியமிக்கப்பட்ட மஸ்க், தன்னுடைய பரிந்துரைகளின் பேரில் ஆட்குறைப்பும், நிதிநீக்க நடவடிக்கைகளும் மேற்கொள்ளப்பட்டன. இதனால் பல தரப்பில் எதிர்ப்பும் போராட்டங்களும் உருவாகின.

இந்த சூழலில், அமெரிக்க செனட் அவையில் ‘Big Beautiful Bill’ என்ற மசோதா தாக்கல் செய்யப்பட்டு விவாதிக்கப்பட்டு வருகிறது. இந்த மசோதா தொடர்பாக எலான் மஸ்க் மறைமுகமாக விமர்சனம் செய்ய, அதிபர் ட்ரம்பின் நிர்வாக பொறுப்பிலிருந்து விலகுவதாகவும் அவர் அறிவித்தார். இதைத் தொடர்ந்து ட்ரம்பு – மஸ்க் இடையேயான உறவில் மோதல் ஆரம்பமானது.

ட்ரம்ப் நிர்வாகம், மஸ்க்கு சொந்தமான நிறுவனங்களுக்கு வழங்கப்பட்ட மானியங்கள் மற்றும் ஒப்பந்தங்களை நிறுத்த மிரட்டல் விடுத்த நிலையில், பதிலடி விளைவாக மஸ்க், “எப்ஸ்டீன் பாலியல் துஷ்பிரயோக வழக்குகளில் ட்ரம்பின் பெயரும் உள்ளது” எனக் குற்றம்சாட்டினார்.

இதற்கு பதிலளித்த ட்ரம்ப், “மஸ்க் சுயநினைவை இழந்துள்ளார். அவருடன் பேச முடியாத நிலை உருவாகியுள்ளது” என கடுமையாக விமர்சித்தார். அதற்கு பதிலளித்த மஸ்க், “ட்ரம்பை பதவிநீக்கம் செய்து ஜே.டி.வான்ஸை அதிபராக நியமிக்க வேண்டும்” எனக் கூறினார்.

துணை அதிபர் ஜே.டி.வான்ஸ்குப் பதிலளித்து, “மஸ்க் அமைதியாக இருந்தால், நிலைமை சரியாகும். அவர் வெளியிட்ட பதிவுகள் உணர்ச்சிவசப்பட்டவை. ட்ரம்பும் மஸ்கும் ஒருகாலத்தில் நெருக்கமானவர்கள். இப்போது அவருடைய நடவடிக்கைகள் நாட்டிற்கு தீங்கானவை. மீண்டும் அவர்கள் இணைவார்கள் என நம்புகிறேன்” என்றார்.

இந்நிலையில், தனது எக்ஸ் (முன்னாள் ட்விட்டர்) கணக்கில் பதிவிட்ட எலான் மஸ்க், “கடந்த வாரம் டொனால்டு ட்ரம்ப் குறித்து எனது சில பதிவுகள் அளவுமீறிச் சென்றுவிட்டன. அதற்காக நான் வருத்தம் தெரிவித்துக் கொள்கிறேன்” எனக் கூறியுள்ளார்.