ஆசியாவிலேயே முட்டை உற்பத்தியில் முன்னிலை வகிக்கும் நாமக்கல் மண்டலத்தில், நுகர்வு குறைவு மற்றும் முட்டைகள் தேக்கம் காரணமாக பண்ணை கொள்முதல் விலை ஒரே நாளில் 20 காசுகள் அதிரடியாகக் குறைக்கப்பட்டுள்ளது. கடந்த மூன்று நாட்களில் மட்டும் முட்டை விலை 40 காசுகள் வரை சரிந்துள்ளதால் கோழிப்பண்ணைத் தொழில் மந்தநிலையைச் சந்தித்துள்ளது.
நாமக்கல்லில் இன்று நடைபெற்ற தேசிய முட்டை ஒருங்கிணைப்புக் குழுவின் (NECC) மண்டல ஆலோசனைக் கூட்டத்தில், முட்டை பண்ணை கொள்முதல் விலை குறித்து விவாதிக்கப்பட்டது. கூட்டத்தின் முடிவில், முட்டை ஒன்றின் விலை 6 ரூபாய் 20 காசுகளில் இருந்து 20 காசுகள் குறைக்கப்பட்டு, 6 ரூபாயாக நிர்ணயம் செய்யப்பட்டது. கடந்த சில தினங்களுக்கு முன்பு வரை உச்சத்தில் இருந்த முட்டை விலை, தற்போது தொடர் சரிவைச் சந்தித்து வருவது பண்ணையாளர்கள் மத்தியில் கவலையை ஏற்படுத்தியுள்ளது.
இந்த விலை வீழ்ச்சிக்கு முக்கியக் காரணமாக, சந்தையில் முட்டை விற்பனை சரிவடைந்து வருவது சுட்டிக்காட்டப்படுகிறது. வட மாநிலங்களில் நிலவும் பருவநிலை மாற்றம் மற்றும் தமிழகத்தின் சில பகுதிகளில் நிலவும் நுகர்வு குறைவு ஆகியவற்றால், பண்ணைகளில் முட்டைகள் அதிக அளவில் தேக்கமடைந்துள்ளன. தேக்கமடைந்த முட்டைகளை விரைந்து சந்தைப்படுத்த வேண்டிய கட்டாயத்தில் பண்ணையாளர்கள் இருப்பதால், விலையைக் குறைக்க வேண்டிய சூழல் ஏற்பட்டுள்ளது.
மேலும், சபரிமலை ஐயப்பன் கோயில் சீசன் மற்றும் மார்கழி மாத ஆன்மீக வழிபாடுகள் காரணமாகத் தமிழகத்தில் முட்டை நுகர்வு கணிசமாகக் குறைந்துள்ளதும் இந்த விலை சரிவிற்கு ஒரு மறைமுகக் காரணியாகப் பார்க்கப்படுகிறது. கடந்த 3 நாட்களில் மட்டும் 40 காசுகள் விலை குறைந்துள்ளதால், பண்ணையாளர்களுக்குக் கிடைக்க வேண்டிய லாப வரம்பு பாதிக்கப்பட்டுள்ளது. குறிப்பாக, கோழித் தீவனங்களின் விலை உயர்ந்துள்ள நிலையில், கொள்முதல் விலை குறைவது பண்ணை பராமரிப்புச் செலவுகளைச் சமாளிக்க முடியாத நிலையை உருவாக்கும் என அஞ்சப்படுகிறது.
நாமக்கல் மண்டலத்திலிருந்து நாள்தோறும் சுமார் 3 முதல் 4 கோடி முட்டைகள் கேரளா மற்றும் வட மாநிலங்களுக்கு ஏற்றுமதி செய்யப்படும் நிலையில், பிற மண்டலங்களான ஐதராபாத் மற்றும் பர்வாலா போன்ற இடங்களிலும் நிலவும் விலை மாற்றங்கள் நாமக்கல் முட்டை விலையில் எதிரொலிக்கின்றன. வரும் நாட்களில் நுகர்வு அதிகரித்தால் மட்டுமே முட்டை விலை மீண்டும் ஏற்றம் காண வாய்ப்புள்ளதாக வியாபாரிகள் தெரிவிக்கின்றனர்.
