தமிழர் திருநாளாம் பொங்கல் பண்டிகையைத் தமிழக மக்கள் உவகையுடனும், மனநிறைவுடனும் கொண்டாடும் வகையில், முதலமைச்சர் மு.க. ஸ்டாலின் அவர்களின் உத்தரவின்படி மாநிலம் முழுவதும் பொங்கல் பரிசுத் தொகுப்பு மற்றும் ரொக்கப்பணம் வழங்கும் திட்டம் இன்று முதல் தீவிரமாக நடைபெற்று வருகிறது. இதன் ஒரு பகுதியாக, மதுரை மாநகராட்சி 31-வது வார்டுக்கு உட்பட்ட பகுதிகளில் உள்ள நியாயவிலைக் கடைகளில், குடும்ப அட்டைதாரர்களுக்குப் பொங்கல் பரிசு வழங்கும் நிகழ்ச்சி நடைபெற்றது. இந்த நிகழ்வில் மதுரை மாநகராட்சி 31-வது வார்டு காங்கிரஸ் கவுன்சிலர் தல்லாகுளம் முருகன் கலந்துகொண்டு, பொதுமக்களுக்குத் தலா ஒரு கிலோ பச்சரிசி, ஒரு கிலோ சர்க்கரை, ஒரு முழு நீளக் கரும்பு, வேட்டி மற்றும் சேலை ஆகியவற்றுடன் அரசு அறிவித்த 3000 ரூபாய் ரொக்கப்பணத்தையும் வழங்கி விநியோகத்தைத் தொடங்கி வைத்தார்.
பரிசுத் தொகுப்பைப் பெற்றுக் கொண்ட பொதுமக்கள், பண்டிகைக் காலத்தில் வழங்கப்படும் இந்த 3000 ரூபாய் ரொக்கப்பணம் தங்களின் குடும்பச் செலவுகளுக்குப் பெரும் உதவியாக இருப்பதாகத் தெரிவித்து மகிழ்ச்சி வெளிப்படுத்தினர். இந்நிகழ்ச்சியில் பேசிய கவுன்சிலர் தல்லாகுளம் முருகன், தமிழகத்தில் ஏழை, எளிய மக்களின் தேவைகளை உணர்ந்து, அவர்களின் வாழ்வாதாரத்தை மேம்படுத்தும் வகையில் மிகச்சிறந்த நல்லாட்சியை முதலமைச்சர் மு.க.ஸ்டாலின் வழங்கி வருகிறார். குறிப்பாக, அனைத்துக் குடும்ப அட்டைதாரர்களுக்கும் எவ்விதப் பாகுபாடுமின்றி 3000 ரூபாய் பொங்கல் பரிசு மற்றும் தொகுப்பு வழங்கியது மிகுந்த பாராட்டுக்குரியது. இத்திட்டத்தைச் சிறப்பாகச் செயல்படுத்திய முதலமைச்சருக்குத் தனது வார்டு பொதுமக்கள் சார்பாகவும், காங்கிரஸ் கட்சி சார்பாகவும் மனமார்ந்த நன்றிகளைத் தெரிவித்துக் கொள்வதாகக் குறிப்பிட்டார்.
இந்த விழாவில் திமுக வார்டு செயலாளர் மோகன், காங்கிரஸ் வார்டு செயலாளர் பிரபு, கார்த்திக், பொன்னுசாமி ஆகியோர் முன்னிலை வகித்தனர். மேலும் விடுதலைச் சிறுத்தைகள் கட்சியின் மாவட்ட செய்தி தொடர்பாளர் தாமரைவளவன் மற்றும் திமுக, காங்கிரஸ் உள்ளிட்ட மதச்சார்பற்ற முற்போக்குக் கூட்டணியைச் சேர்ந்த ஏராளமான நிர்வாகிகள் மற்றும் தொண்டர்கள் கலந்து கொண்டனர். 31-வது வார்டுக்கு உட்பட்ட அனைத்து நியாயவிலைக் கடைகளிலும் எவ்விதப் புகாருமின்றி, வரிசையில் நின்று பொதுமக்கள் தங்களின் பொங்கல் பரிசைப் பெறுவதை உறுதி செய்ய வேண்டும் என அதிகாரிகளுக்கும், கட்சித் தொண்டர்களுக்கும் கவுன்சிலர் அறிவுறுத்தினார். மாநகராட்சி வார்டு பகுதிகளில் பண்டிகை கால உற்சாகத்துடன் இந்த விநியோகப் பணிகள் தொய்வின்றி நடைபெற்று வருகின்றன.
