ஏமனில் கொலை வழக்கில் மரண தண்டனை பெற்றுள்ள கேரளாவைச் சேர்ந்த இந்திய செவிலியர் நிமிஷா பிரியாவை மீட்கும் முயற்சியில் புதிய திருப்பம் ஏற்பட்டுள்ளது. நிமிஷாவுக்கு வழங்கப்பட்ட மரண தண்டனையை நிறுத்த உச்சநீதிமன்றத்தில் தாக்கல் செய்யப்பட்ட மனுவை அவசர வழக்காக விசாரிக்க ஒப்புதல் வழங்கப்பட்டுள்ளது.
‘சேவ் நிமிஷா பிரியா அதிரடி கவுன்சில்’ எனும் அமைப்பின் வழியாக, மத்திய அரசு தூதரக ரீதியில் பேச்சுவார்த்தை நடத்த உத்தரவிட வேண்டும் என கோரி தாக்கல் செய்யப்பட்ட மனுவை நீதிபதிகள் விக்ரம் நாத் மற்றும் சந்தீப் மேத்தா அமர்வு இன்று விசாரித்தது.
இந்த விவகாரத்தில், அட்டர்னி ஜெனரல் ஆர். வெங்கடரமணி தாக்கல் செய்த பதிலில், “இந்த வழக்கில் சமாதான பேச்சுவார்த்தைகள் நடைபெற்று வருகின்றன. மரண தண்டனையை நிறுத்தி வைக்க ஏமன் அரசிடம் கோரப்பட்டுள்ளது. ஆனால், அவர்கள் இது குறித்து எந்த உறுதியான பதிலும் வழங்கவில்லை. இடைப்பட்ட காலத்தில் மரண தண்டனை தள்ளிப்போடப்படும் என்ற தகவல் வந்தது. ஆனால், அது உறுதியாக முடியுமா என்பது சந்தேகமே. மத்திய அரசு தனது எல்லையை கடந்த எந்த நடவடிக்கையும் எடுக்க முடியாத நிலை உள்ளது,” என தெரிவித்தார்.
மேலும், நிமிஷாவின் குடும்பத்தினர் ஏமன் நபரின் குடும்பத்துக்கு ரூ.8.5 கோடி (1 மில்லியன் டாலர்) இழப்பீடாக வழங்க முயன்றும், அதை அவர்கள் ஏற்க மறுத்திருப்பது குறிப்பிடத்தக்கது.
இந்த வழக்கு மீதான தீர்ப்பு மட்டுமின்றி, இந்திய குடியரசு குடிமக்களின் பாதுகாப்புக்கான இராஜதந்திர நடவடிக்கைகள் குறித்து சீரிய அக்கறையை ஏற்படுத்தியுள்ளது.
