திண்டுக்கல் மாவட்டம் நத்தம் பேரூராட்சிக்கு உட்பட்ட பகுதிகளில் நாளுக்கு நாள் அதிகரித்து வரும் தெருநாய்களின் அட்டகாசத்தைக் கண்டித்து, மார்க்சிஸ்ட் கம்யூனிஸ்ட் கட்சி சார்பில் ஒட்டப்பட்டுள்ள ஒரு வினோத போஸ்டர் சமூக வலைதளங்களிலும் அரசியல் வட்டாரத்திலும் பெரும் பேசுபொருளாக மாறியுள்ளது. நத்தம் நகரின் முக்கிய பகுதிகளான மீனாட்சிபுரம், அசோக் நகர், செட்டியார் குளத் தெரு, முஸ்லிம் தெரு உள்ளிட்ட இடங்களில் நாய்கள் கூட்டம் கூட்டமாகச் சுற்றித் திரிவதோடு, சாலையில் நடந்து செல்லும் சிறுவர்கள் முதல் முதியவர்கள் வரை அனைவரையும் துரத்திச் சென்று கடித்துக் குதறும் சம்பவங்கள் தொடர்கதையாகி வருகின்றன. இதனால் பள்ளி செல்லும் குழந்தைகள் மற்றும் அதிகாலையில் வேலைக்குச் செல்லும் பொதுமக்கள் வீட்டை விட்டு வெளியே வரக்கூட அஞ்சும் சூழல் உருவாகியுள்ளது. இது குறித்துப் பலமுறை பேரூராட்சி நிர்வாகத்திடம் புகார் அளித்தும் எந்தவிதமான ஆக்கப்பூர்வமான நடவடிக்கையும் எடுக்கப்படாததால், நிர்வாகத்தின் கவனத்தை ஈர்க்கும் வகையில் மார்க்சிஸ்ட் கம்யூனிஸ்ட் கட்சியினர் இந்த அதிரடிப் போராட்டத்தைக் கையில் எடுத்துள்ளனர்.
அந்தப் போஸ்டரில், “தமிழக அரசும், மாவட்ட நிர்வாகமும் பொதுமக்களை அச்சுறுத்தும் தெருநாய்களை உடனடியாகக் கட்டுப்படுத்த வேண்டும்; அவ்வாறு செய்யத் தவறினால் அந்த நாய்களை வாக்காளர் பட்டியலில் சேர்த்து விடுங்கள்” என்று வாசகங்கள் இடம்பெற்றுள்ளன. நாய்களை வாக்காளர் பட்டியலில் சேர்க்கக் கோருவதன் மூலம், தெருநாய்களுக்குக் கொடுக்கும் முக்கியத்துவத்தைக் கூட நிர்வாகம் பொதுமக்களுக்கு வழங்கவில்லை என்பதையும், மக்களின் உயிருக்கு பாதுகாப்பற்ற சூழல் நிலவுவதையும் அவர்கள் கிண்டலாகவும் ஆவேசமாகவும் வெளிப்படுத்தியுள்ளனர். தெருநாய்களைப் பிடித்துக் கருத்தடை செய்யும் பணிகளோ அல்லது அவற்றைப் பராமரிப்பு மையங்களுக்கு மாற்றும் பணிகளோ நத்தம் பகுதியில் முடங்கிக் கிடப்பதாகப் புகார் எழுந்துள்ளது. குறிப்பாக இரவு நேரங்களில் இருசக்கர வாகனங்களில் செல்பவர்கள் நாய்கள் துரத்துவதால் நிலைதடுமாறி விழுந்து விபத்துக்குள்ளாவதும் அன்றாட நிகழ்வாக மாறியுள்ளது.
நத்தம் பகுதியில் நிலவும் இந்த சுகாதார மற்றும் பாதுகாப்பு அச்சுறுத்தலுக்குப் பேரூராட்சி நிர்வாகம் போர்க்கால அடிப்படையில் தீர்வு காண வேண்டும் என்பதே பொதுமக்களின் எதிர்பார்ப்பாக உள்ளது. மாவட்ட நிர்வாகம் தலையிட்டு நாய் கடி தடுப்பூசிகள் ஆரம்ப சுகாதார நிலையங்களில் போதிய அளவில் இருப்பதை உறுதி செய்வதோடு, தெருநாய்களைக் கட்டுப்படுத்த முறையான திட்டத்தைச் செயல்படுத்த வேண்டும் என்றும் வலியுறுத்தப்பட்டுள்ளது. இந்த நூதனப் போராட்டம், அதிகாரிகளின் மெத்தனப் போக்கிற்குச் சவுக்கடி கொடுக்கும் வகையில் அமைந்துள்ளதாக இப்பகுதி சமூக ஆர்வலர்கள் கருத்து தெரிவித்து வருகின்றனர். ஆவேசமும் நையாண்டியும் கலந்த இந்த போஸ்டர் போர், நத்தம் பகுதியில் பெரும் பரபரப்பை ஏற்படுத்தியுள்ளது.
