சென்னை:
சென்னையில் பணிபுரியும் தூய்மை பணியாளர்களுக்காக மூன்று வேளைகளிலும் இலவச உணவு வழங்கும் சிறப்பு நலத்திட்டத்தை வரும் நவம்பர் 15ஆம் தேதி தமிழக முதலமைச்சர் மு.க.ஸ்டாலின் தொடங்கி வைக்க உள்ளதாக சென்னை மாநகராட்சி மேயர் பிரியா ராஜன் தெரிவித்தார்.
இந்தத் திட்டம் தூய்மை பணியாளர்களின் நலனை முன்னிட்டு உருவாக்கப்பட்டதாகவும், இதற்காக மூன்று ஆண்டுகளுக்கு ரூ.186 கோடி நிதி ஒதுக்கீடு செய்யப்பட்டுள்ளதாகவும் தெரிவிக்கப்பட்டுள்ளது.
தூய்மை பணியாளர்கள் அதிகாலையிலேயே பணியில் ஈடுபட வேண்டியதால், காலை உணவு தயாரிக்கவும் அதை வேலை இடத்தில் எடுத்துச் செல்லவும் சிரமம் ஏற்படுவது வழக்கம். இதை கருத்தில் கொண்டு, நகர்ப்புற உள்ளாட்சி அமைப்புகளில் பணிபுரியும் பணியாளர்களுக்கு மூன்று வேளைகளிலும் உணவு மாநகராட்சியின் சமையலறைகளில் இருந்து இலவசமாக வழங்கப்படும்.
முதற்கட்டமாக பெருநகர சென்னை மாநகராட்சியில் திட்டம் அமல்படுத்தப்பட்டு, பின்னர் மாநிலம் முழுவதும் உள்ள நகராட்சிகளுக்கும் விரிவுபடுத்தப்படும்.
உணவுப் பட்டியலில் காலை நேரத்தில் இட்லி, உப்புமா போன்றவை, மதியத்தில் சாம்பார், ரசம், கூட்டு, இரவில் சப்பாத்தி அல்லது ரொட்டி உள்ளிட்டவை இடம்பெறும். இவை ஊட்டச்சத்து நிறைந்தவையாக இருக்கும் எனவும் கூறப்பட்டுள்ளது.
மேலும், மாநகராட்சியின் பல்வேறு சமுதாய நலக் கூடங்கள் மேம்படுத்தும் பணிகளும் வேகமாக நடைபெற்று வருகின்றன. இதுகுறித்து மேயர் பிரியா ராஜன் கூறியதாவது:
“முதலமைச்சர் ஸ்டாலின் தலைமையில் கல்வி, மருத்துவம், சமூக நலம் ஆகிய துறைகளில் பல திட்டங்கள் வெற்றிகரமாக செயல்படுத்தப்பட்டுள்ளன. தற்போது தூய்மை பணியாளர்களுக்கான இந்த இலவச உணவுத் திட்டம் அவர்களின் வாழ்க்கை தரத்தை உயர்த்தும் ஒரு முக்கியமான முயற்சியாக இருக்கும்,” என்றார்.
மாநகராட்சியின் தகவலின்படி, இந்த திட்டத்தின் மூலம் மொத்தம் 31,373 தூய்மை பணியாளர்கள் பயனடைவார்கள் என தெரிவிக்கப்பட்டுள்ளது.
