வான்கடேவில் பும்ராவின் அனல்தெறிக்கும் பந்துவீச்சு: சாம்சன் அதிரடியில் இங்கிலாந்தை வீழ்த்தி இறுதிப்போட்டிக்குள் நுழைந்தது இந்தியா!

மும்பை வான்கடே மைதானத்தில் நடைபெற்ற டி20 உலகக்கோப்பை அரை இறுதி ஆட்டத்தில், இங்கிலாந்து அணிக்கு எதிராக 7 ரன்கள் வித்தியாசத்தில் திரில் வெற்றி பெற்ற இந்திய அணி, 4-வது முறையாக உலகக்கோப்பை இறுதிப்போட்டிக்குத் தகுதி பெற்றுச் சாதனை படைத்துள்ளது. முதலில் பேட்டிங் செய்த இந்திய அணி, சஞ்சு சாம்சனின் ருத்ரதாண்டவத்தால் (89 ரன்கள், 8 பவுண்டரி, 7 சிக்சர்) 20 ஓவர்களில் 253 ரன்கள் என்ற இமாலய இலக்கை எட்டியது. ஷிவம் துபே மற்றும் இஷான் கிஷன் ஆகியோரும் அதிரடியில் கை கொடுக்க, இந்தியா எளிதில் வெல்லும் என எதிர்பார்க்கப்பட்டது. ஆனால், இங்கிலாந்தின் இளம் வீரர் ஜேக்கப் பெத்தேல் 45 பந்துகளில் சதமடித்து (105 ரன்) இந்திய ரசிகர்களுக்குப் பயத்தைக் காட்டினார். கடைசி ஓவரின் முதல் பந்தில் அவர் ரன்-அவுட் ஆன பிறகே இந்தியா நிம்மதி பெருமூச்சு விட்டது.

இந்த வெற்றியின் பின்னணியில் ஜஸ்பிரித் பும்ராவின் மாயாஜால பந்துவீச்சு முக்கியப் பங்கு வகித்தது. பேட்ஸ்மேன்களுக்குச் சாதகமான ஆடுகளத்தில், 4 ஓவர்களில் 33 ரன்கள் மட்டுமே விட்டுக்கொடுத்து பும்ரா சிக்கனம் காட்டினார். குறிப்பாக, போட்டியின் போக்கை மாற்றிய 18-வது ஓவரில் அவர் வெறும் 6 ரன்கள் மட்டுமே வழங்கி இங்கிலாந்தை நிலைகுலையச் செய்தார். ஆட்டநாயகன் விருது வென்ற சஞ்சு சாம்சன், தனது விருதை பும்ராவுக்கு அர்ப்பணிக்கும் வகையில் நெகிழ்ச்சியாகப் பேசினார். “இந்த விருது உண்மையில் பும்ராவுக்குத்தான் சென்றிருக்க வேண்டும். அவர் தலைமுறைக்கு ஒருமுறை கிடைக்கும் உலகத்தரம் வாய்ந்த பந்து வீச்சாளர். கடைசி கட்டத்தில் அவர் மட்டும் சிறப்பாகப் பந்து வீசியிருக்காவிட்டால், நான் இன்று ஆட்டநாயகனாக இங்கு நின்றிருக்க முடியாது” என்று புகழாரம் சூட்டினார்.

மேலும் தனது அனுபவம் குறித்துப் பேசிய சாம்சன், “ஐபிஎல் கேப்டன்சி மற்றும் 400-க்கும் மேற்பட்ட டி20 போட்டிகளில் விளையாடிய அனுபவம், இக்கட்டான சூழலில் அணிக்கு என்ன தேவை என்பதை எனக்கு உணர்த்தியுள்ளது. தனிப்பட்ட சதத்தை விட அணியின் வெற்றியே எனக்கு முக்கியம்,” எனத் தெளிவுபடுத்தினார். 97 மற்றும் 89 ரன்கள் எடுத்து சதத்தை நழுவவிட்டது குறித்துக் கேட்டபோது, அணியின் வெற்றிக்கான பங்களிப்பே பெரிய விஷயம் என முதிர்ச்சியுடன் பதிலளித்தார். நாளை அகமதாபாத்தில் நடைபெறவுள்ள இறுதிப்போட்டியில் இந்தியா – நியூசிலாந்து அணிகள் பலப்பரீட்சை நடத்தவுள்ளன. இதற்காக இரு அணி வீரர்களும் இன்று தீவிரப் பயிற்சியில் ஈடுபட்டு வருகின்றனர்.