காஞ்சிபுரம் மாவட்டம் உத்திரமேரூர் அருகே உள்ள வரலாற்றுச் சிறப்புமிக்க பெருநகர் கிராமத்தில், பட்டுவதனாம்பிகை உடனுறை ஸ்ரீ பிரம்மபுரீஸ்வரர் திருக்கோயிலில் தைப்பூசப் பெருவிழா பக்திப் பரவசத்துடன் நடைபெற்று வருகிறது. கடந்த ஜனவரி 23-ம் தேதி கொடியேற்றத்துடன் கோலாகலமாகத் தொடங்கிய இந்த 14 நாள் உற்சவத்தில், நாள்தோறும் சுவாமிக்கும் அம்பாளுக்கும் சிறப்பு அபிஷேகங்கள் நடைபெற்று, பல்வேறு வாகனங்களில் வீதியுலா வந்து பக்தர்களுக்கு அருள்பாலித்து வந்தனர். விழாவின் சிகர நிகழ்ச்சியான மகா திருத்தேரோட்டம் கடந்த 29-ம் தேதி பல்லாயிரக்கணக்கான பக்தர்கள் முன்னிலையில் விமரிசையாகத் தேரோடிய நிலையில், விழாவின் ஒன்பதாம் நாளான நேற்று மிகவும் எதிர்பார்ப்புக்குரிய 63 நாயன்மார்கள் வீதியுலா மகா உற்சவம் கோலாகலமாக நடைபெற்றது.
இந்த மகா உற்சவத்தை முன்னிட்டு, மூலவர் பிரம்மபுரீஸ்வரர் மற்றும் அம்பாளுக்கு விசேஷ திரவியங்களால் அபிஷேகம் செய்யப்பட்டு, வண்ண மலர்களால் சிறப்பு அலங்காரம் செய்யப்பட்டது. அதனைத் தொடர்ந்து, ஸ்ரீ பிரம்மபுரீஸ்வரர் சிறப்பு அலங்காரத்துடன் திருமுன்பு எழுந்தருளி பக்தர்களுக்குக் காட்சியளித்தார். திருக்கோயிலில் இருந்து புறப்பட்ட பிரம்மபுரீஸ்வரருடன், அம்பாள், விநாயகர் மற்றும் முருகப்பெருமான் ஆகிய தெய்வங்கள் முன்செல்ல, அவர்களைத் தொடர்ந்து சிவத்தொண்டர்களான 63 நாயன்மார்களின் சிலைகள் அலங்கரிக்கப்பட்ட வாகனங்களில் ஒன்றன்பின் ஒன்றாக அணிவகுத்து வீதியுலா வந்த காட்சி காண்போரை மெய்சிலிர்க்க வைத்தது. பெருநகர் கிராமத்தின் முக்கிய வீதிகள் வழியாக நடைபெற்ற இந்த ஊர்வலத்தில், வழிநெடுகிலும் திரளான பக்தர்கள் திரண்டு நின்று கற்பூர ஆரத்தி எடுத்து சிவபெருமானையும், சிவனடியார்களையும் தரிசனம் செய்தனர்.
இந்த ஆன்மீக சங்கமத்தில், அண்டை மாநிலமான பாண்டிச்சேரியின் பொதுப்பணித்துறை அமைச்சர் லட்சுமிநாராயணன் சிறப்பு விருந்தினராகக் கலந்துகொண்டு சாமி தரிசனம் செய்தார். தைப்பூசத் திருவிழாவால் விழாக்கோலம் பூண்டுள்ள பெருநகர் கிராமம் எங்கும் பக்தர்களின் வசதிக்காகப் பல்வேறு தொண்டு நிறுவனங்கள் மற்றும் பொதுமக்கள் சார்பில் அன்னதானம், குடிநீர் மற்றும் நீர்மோர் ஆகியவை தடையின்றி வழங்கப்பட்டன. இந்த விழாவிற்கான விரிவான ஏற்பாடுகளைத் திருக்கோயில் விழா குழுவினர் மற்றும் ஊர் பொதுமக்கள் இணைந்து மிகச் சிறப்பாகச் செய்திருந்தனர். பெருநகர் மட்டுமின்றி உத்திரமேரூர் மற்றும் அதன் சுற்றுவட்டாரத்தைச் சேர்ந்த ஆயிரக்கணக்கான கிராம மக்கள் இந்த மகா உற்சவத்தில் பங்கேற்றது, அந்தப் பகுதியையே பக்தி மழையில் நனைய வைத்தது.