மதுரை மாவட்டம் அலங்காநல்லூர் ஒன்றியத்திற்கு உட்பட்ட வைகாசிபட்டி கிராமத்தில், கால்நடை வளர்ப்பு மற்றும் பால் உற்பத்தியை மேம்படுத்தும் நோக்கில் அசோலா வளர்ப்பு குறித்த செய்முறை விளக்க முகாம் நடைபெற்றது. உசிலம்பட்டி கிருஷ்ணா வேளாண்மை மற்றும் தொழில்நுட்பக் கல்லூரியின் இளநிலை இறுதி ஆண்டு மாணவர்கள், தங்களது ‘கிராம தங்கல்’ திட்டத்தின் (RAWE) கீழ் இந்த விழிப்புணர்வு நிகழ்வை ஒருங்கிணைத்தனர். கால்நடைகளுக்குத் தரமான மற்றும் குறைந்த செலவிலான தீவனம் வழங்குவதன் அவசியத்தை வலியுறுத்தி, மாணவர்கள் விவசாயிகளிடையே நேரடிச் செயல்விளக்கம் அளித்தனர்.
இந்தச் செயல்முறை விளக்கத்தின் போது, பிளாஸ்டிக் விரிப்புடன் கூடிய ஆழமற்ற குழி அல்லது தொட்டியை எவ்வாறு தயார் செய்வது என்பது குறித்து மாணவர்கள் விரிவாக எடுத்துரைத்தனர். தொட்டியின் அடிப்பகுதியில் மண், மாட்டுச் சாணம் மற்றும் சூப்பர் பாஸ்பேட் கலவையைச் சீராகப் பரப்பி, அதில் சுமார் 10 முதல் 15 சென்டிமீட்டர் வரை நீர் நிரப்ப வேண்டும். பின்னர், அதில் புதிய அசோலாக்களைத் தூவி பரப்ப வேண்டும். நேரடி சூரிய ஒளி படாதவாறு நிழற்பாங்கான இடத்தைத் தேர்வு செய்வதும், நீர்மட்டத்தைச் சரியாகப் பராமரிப்பதும் மிக முக்கியம். இவ்வாறு செய்வதன் மூலம் 10 முதல் 15 நாட்களில் அசோலா நன்கு வளர்ந்து படர்ந்துவிடும். இதனைத் தினசரி அறுவடை செய்து பசு, ஆடு மற்றும் கோழிகளுக்கு உயர்தர புரதத் தீவனமாகப் பயன்படுத்தலாம் என மாணவர்கள் விளக்கினர்.
மாணவர்கள் கார்த்திகேயன், ஜெய் பிரகாஷ், சக்திவேல், யுவராஜா, சருண் குமார், விஷ்ணு மற்றும் தரணிதரன் ஆகியோர் அடங்கிய குழுவினர் இந்தத் தொழில்நுட்பத்தை விவசாயிகளுக்கு எளிமையாகப் புரிய வைத்தனர். அசோலா தீவனத்தை உட்கொள்வதன் மூலம் கால்நடைகளின் உடல் நலம் மேம்படுவதோடு, பாலின் தரம் மற்றும் அளவு அதிகரிப்பதையும் அவர்கள் சுட்டிக்காட்டினர். இந்த நிகழ்வின் போது வேளாண் உதவி அலுவலர்கள் உடனிருந்து மாணவர்களின் முயற்சிகளை ஊக்குவித்ததோடு, விவசாயிகளின் சந்தேகங்களுக்கும் விளக்கம் அளித்தனர். நவீனத் தொழில்நுட்பங்களை நேரடியாகக் கிராமப்புறங்களுக்குக் கொண்டு செல்லும் மாணவர்களின் இந்த முயற்சிக்கு வைகாசிபட்டி கிராம மக்கள் பாராட்டுத் தெரிவித்தனர்.
