ஆசியக் கோப்பை கிரிக்கெட் தொடரைச் சூழ்ந்த சர்ச்சையில், பாகிஸ்தான் கிரிக்கெட் வாரியம் நடுவர் ஆண்டி பைகிராஃப்ட்டை நீக்கக் கோரி அளித்த புகாரை சர்வதேச கிரிக்கெட் கவுன்சில் நிராகரித்துள்ளது. அதேசமயம், சமரச நடவடிக்கையாக ரிச்சி ரிச்சர்ட்சன் பாகிஸ்தான் போட்டிகளில் புதிய நடுவராக நியமிக்கப்பட்டுள்ளார்.
இந்தியா–பாகிஸ்தான் போட்டி சர்ச்சை
செப்டம்பர் 14 அன்று நடைபெற்ற இந்தியா–பாகிஸ்தான் மோதலில், இந்திய அணி வெற்றி பெற்றது. ஆனால், போட்டிக்குப் பிறகு இரு அணியினருக்கும் இடையே கைகுலுக்கல் நிகழவில்லை. பாகிஸ்தான் வீரர்கள் மற்றும் பயிற்சியாளர் மைக் ஹெசன், இந்திய அணியின் அறைக்கு சென்று கை கொடுக்க முயன்றபோதும், இந்திய வீரர்கள் வெளியே வராதது சர்ச்சையை ஏற்படுத்தியது.
ஏற்கனவே, டாஸ் நேரத்திலும் இரு அணித் தலைவர்கள் கை குலுக்கவில்லை. இதனை பாகிஸ்தான் கடுமையாக எதிர்த்து, ஆசிய கிரிக்கெட் கவுன்சிலும், பின்னர் ஐசிசியிடமும் புகார் அளித்தது.
நடுவர் நீக்கக் கோரிக்கை
இந்தச் சம்பவத்திற்கு போட்டி நடுவர் ஆண்டி பைகிராஃப்ட் (ஜிம்பாப்வே) பொறுப்பு எனக் கூறி, அவரை பாகிஸ்தான் அணியுடன் நடைபெறும் போட்டிகளில் இருந்து நீக்க வேண்டும் என்று PCB வலியுறுத்தியது. ஆனால், ஐசிசி அந்தக் கோரிக்கையை நிராகரித்தது.
சமரச முடிவு
அதேநேரத்தில், ஐசிசி மற்றும் பிசிபி இடையிலான பேச்சுவார்த்தையின் மூலம், ஆண்டி பைகிராஃப்ட்டுக்கு பதிலாக முன்னாள் வெஸ்ட் இண்டீஸ் வீரர் ரிச்சி ரிச்சர்ட்சன் பாகிஸ்தான் போட்டிகளில் நடுவராக நியமிக்கப்படுகிறார் என்று பிசிபி வட்டாரங்கள் உறுதிப்படுத்தியுள்ளன.
இதன் ஒரு பகுதியாக, இன்றைய பாகிஸ்தான் – UAE போட்டியில் ரிச்சர்ட்சன் நடுவராக களமிறங்க உள்ளார்.
விலகல் அபாயம் தவிர்க்கப்பட்டது
புகார் ஏற்கப்படாவிட்டால் தொடரிலிருந்தே விலகுவது குறித்து பாகிஸ்தான் யோசித்ததாக தகவல்கள் முன்பு வெளியாகியிருந்தன. ஆனால் அப்படி நடந்திருந்தால், பிசிபிக்கு சுமார் 16 மில்லியன் அமெரிக்க டாலர் இழப்பு ஏற்பட்டிருக்கும் என வல்லுநர்கள் கூறுகின்றனர்.
