பாமக நிறுவனர் டாக்டர் ராமதாஸ், “அன்புமணி தனிக்கட்சி தொடங்கிக் கொள்ளலாம்; பாமக நான் தொடங்கிய கட்சி. இதை உரிமை கொண்டாட யாருக்கும் உரிமையில்லை” என்று தெரிவித்துள்ளார்.
கட்சியின் ஒழுங்கு நடவடிக்கை குழுவின் 16 குற்றச்சாட்டுகளுக்கும் பதிலளிக்காததால், அன்புமணியை செயல்தலைவர் பதவியிலிருந்தும், அடிப்படை உறுப்பினர் பொறுப்பிலிருந்தும் நீக்குவதாக ராமதாஸ் அறிவித்தார்.
தைலாபுரத்தில் செய்தியாளர்களிடம் பேசிய அவர், “அன்புமணி இதுவரை எவரும் செய்யாத வகையில் கட்சி விரோத நடவடிக்கையில் ஈடுபட்டுள்ளார். தான்தோன்றி தனமான செயல் மட்டுமின்றி, ஒரு அரசியல்வாதிக்கு தகுதியற்றவர் என்பதை நிரூபித்துள்ளார். இதனால் பாமக தலைவர்கள், நிர்வாகிகள், உறுப்பினர்கள் மனம் புண்பட்டுள்ளனர்” என்று கூறினார்.
அவர் மேலும், “அன்புமணியுடன் செயல்பட்ட 10 பேர் மீது வருத்தம் இருந்தாலும், அவர்களை மன்னிக்கத் தயார். ஆனால், அன்புமணி மூத்தோர் அறிவுரைகளைக் கேட்காமல் இந்த நிலைக்கு வந்துவிட்டார். அவருக்கு தனிக்கட்சி தொடங்கும் சுதந்திரம் உண்டு. பாமக என் உழைப்பால் உருவாக்கப்பட்டது; அதனை வேறு யாரும் உரிமை கொண்டாட முடியாது” எனவும் வலியுறுத்தினார்.
அதே நேரத்தில், “கட்சி அழிக்கப்படுவதைத் தவிர்க்க, களையை நீக்கியுள்ளோம். இது பாமகவுக்கு பின்னடைவு அல்ல” என ராமதாஸ் தெரிவித்தார்.
