திண்டுக்கல் மாவட்டம் நத்தம் அருகே கம்பிளியம்பட்டியில் பிரசித்தி பெற்ற வரசித்தி வாராகி அம்மன் ஆலயத்தில், உலக நன்மை மற்றும் மக்கள் சுபிட்சம் வேண்டி வளர்பிறை பஞ்சமி தினத்தை முன்னிட்டு மகா யாக பூஜைகள் மிக விமரிசையாக நடைபெற்றன. வாராகி அம்மனுக்கு உகந்த திதிகளில் பஞ்சமி திதி மிகவும் மகத்துவமானது என்பதால், அதிகாலை முதலே ஆலயத்தில் சிறப்பு வழிபாடுகள் தொடங்கின. விழாவின் முக்கிய நிகழ்வாக, பீடாதிபதி சஞ்சீவி சாமிகள் தலைமையில் வளர்பிறை பஞ்சமி யாக வேள்வி நடைபெற்றது. இதில் நறுமணப் பொருட்கள் மற்றும் ஹோம திரவியங்கள் இட்டு, மந்திரங்கள் முழங்க யாகம் வளர்க்கப்பட்டு பூர்ணாஹுதி நடைபெற்றது. இதனைத் தொடர்ந்து, மூலவர் வாராகி அம்மனுக்கு பால், தயிர், இளநீர், சந்தனம் உள்ளிட்ட 16 வகை திரவியங்களால் மகா அபிஷேகம் நடத்தப்பட்டு, பல வண்ண மலர்களால் அம்மன் ராஜ அலங்காரத்தில் காட்சியளித்தார்.
இந்த பூஜையின் ஒரு பகுதியாக, தங்களது கோரிக்கைகள் நிறைவேறவும், குடும்ப கஷ்டங்கள் நீங்கவும் வேண்டி, நூற்றுக்கணக்கான பக்தர்கள் தேங்காயில் நெய் தீபமேற்றி கோயிலைச் சுற்றி வந்து சிறப்பு வழிபாடு செய்தனர். வாராகி அம்மனுக்கு உகந்த இந்த தனித்துவமான வழிபாட்டில் பங்கேற்றால் எதிரிகள் தொல்லை நீங்கும் என்பதும், தீராத நோய்கள் தீரும் என்பதும் பக்தர்களின் தீராத நம்பிக்கையாக உள்ளது. இந்த ஆன்மீக நிகழ்வில் திண்டுக்கல் மாவட்டம் மட்டுமின்றி, திருச்சி, சிவகங்கை, தேனி உள்ளிட்ட அண்டை மாவட்டங்களிலிருந்தும் ஆயிரக்கணக்கான பக்தர்கள் வருகை தந்து நீண்ட வரிசையில் காத்திருந்து அம்மனை தரிசனம் செய்தனர். வேண்டுதல் நிறைவேறிய பக்தர்கள் மற்றும் உபயதாரர்கள் சார்பில் வந்திருந்த பக்தர்கள் அனைவருக்கும் மதிய அன்னதானம் வழங்கப்பட்டது. விழாவிற்கான ஏற்பாடுகளை கோயில் நிர்வாகத்தினர் மற்றும் கிராம பொதுமக்கள் சிறப்பாகச் செய்திருந்தனர்.
