கன்னியாகுமரி மாவட்ட ஊரக வளர்ச்சி முகமை சார்பில், தோவாளை வட்டாரப் பகுதிகளில் செயல்படுத்தப்பட்டு வரும் ‘கலைஞரின் கனவு இல்லம்’ திட்டத்திற்கான பயனாளிகள் தேர்வு குறித்து, மாவட்ட ஆட்சித் தலைவர் ஆர்.அழகுமீனா நேரில் ஆய்வு மேற்கொண்டார். தமிழக முதலமைச்சர் தலைமையிலான அரசு, ஊரகப் பகுதிகளில் வசிக்கும் வீடு இல்லாத ஏழை, எளிய மக்கள் பாதுகாப்பான மற்றும் நிரந்தரமான கான்கிரீட் வீடுகளில் வசிக்க வேண்டும் என்ற உயரிய நோக்கில் இத்திட்டத்தை அறிவித்துச் செயல்படுத்தி வருகிறது. இத்திட்டத்தின் கீழ் ஒவ்வொரு பயனாளிகளுக்கும் வீடு கட்ட தலா ரூ. 3.10 லட்சம் நிதி வழங்கப்பட்டு வருகிறது.
இந்தத் திட்டத்தின் முக்கியத்துவம் குறித்துப் பேசிய ஆட்சியர் ஆர்.அழகுமீனா, கடந்த 24.01.2026 அன்று தமிழ்நாடு சட்டப்பேரவையில் முதலமைச்சர் அவர்கள் வெளியிட்ட அறிவிப்பின்படி, 2025–2026 ஆம் நிதியாண்டில் கூடுதலாக ஒரு லட்சம் வீடுகள் கட்டப்பட உள்ளதாகக் குறிப்பிட்டார். அதனடிப்படையில், கன்னியாகுமரி மாவட்டத்திற்கு மட்டும் நடப்பு ஆண்டிற்கு 1,000 வீடுகள் ஒதுக்கீடு செய்யப்பட்டுள்ளன. இதற்கான தகுதியான பயனாளிகளைத் தேர்வு செய்யும் பணிகள் தற்போது தீவிரமாக நடைபெற்று வருகின்றன. பயனாளிகள் தேர்வு மற்றும் இலவச பட்டா வழங்குதல் தொடர்பான விரிவான ஆய்வுக் கூட்டம் தோவாளை ஊராட்சி ஒன்றிய அலுவலகத்தில் துறை சார்ந்த அலுவலர்களுடன் நடைபெற்றது.
அதனைத் தொடர்ந்து, தோவாளை ஊராட்சி ஒன்றியம் ஈசாந்திமங்கலம் ஊராட்சிக்குட்பட்ட ஞானதாசபுரம் குக்கிராமம் மற்றும் அருமநல்லூர் ஊராட்சிக்குட்பட்ட அம்பட்டையான் காலனி குக்கிராமங்களுக்குச் சென்ற மாவட்ட ஆட்சியர், அங்குத் தேர்வு செய்யப்பட்ட பயனாளிகள் மற்றும் வீடுகள் கட்டப்பட உள்ள இடங்கள் குறித்துத் தரைமட்டக் கள ஆய்வு (Field Inspection) மேற்கொண்டார். இந்த ஆய்வின் போது, மாவட்ட ஊரக வளர்ச்சி முகமையின் திட்ட இயக்குநர் மைக்கேல் அந்தோணி பெர்னாண்டோ, தோவாளை வட்டார வளர்ச்சி அலுவலர்கள் தங்கராஜ், கருணாகரன், வட்டார உதவிச் செயற்பொறியாளர் கீதா ஆகியோர் உடனிருந்தனர். மேலும், மண்டல துணை வட்டார வளர்ச்சி அலுவலர்கள், பணி மேற்பார்வையாளர்கள், வருவாய் ஆய்வாளர், கிராம நிர்வாக அலுவலர் மற்றும் ஊராட்சி செயலர்கள் உள்ளிட்ட அரசு அதிகாரிகள் பலர் இந்த ஆய்வில் கலந்து கொண்டனர்.
