தமிழக அரசியலின் திருப்புமுனை மையமாக எப்போதும் விளங்கும் திருச்சியில், திராவிட முன்னேற்றக் கழகத்தின் சார்பில் “ஸ்டாலின் தொடரட்டும், தமிழ்நாடு வெல்லட்டும்” என்ற முழக்கத்துடன் மார்ச் 8-ம் தேதி நடைபெற உள்ள பிரம்மாண்ட மாநில மாநாட்டிற்கான தொடக்கப் பணிகள் இன்று உத்வேகத்துடன் தொடங்கின. திமுக தலைவரும் தமிழ்நாடு முதலமைச்சருமான மு.க. ஸ்டாலினின் வழிகாட்டுதலின்படி, திருச்சி – சென்னை தேசிய நெடுஞ்சாலையில் அமைந்துள்ள சிறுகனூர் பகுதியில் சுமார் 10 லட்சம் தொண்டர்கள் பங்கேற்கும் வகையில் அமையவுள்ள இந்த மாநாட்டுத் திடலில், பந்தக்கால் நடும் வைபவம் இன்று காலை கோலாகலமாக நடைபெற்றது. இந்த நிகழ்வில் திமுக முதன்மைச் செயலாளரும் நகராட்சி நிர்வாகத்துறை அமைச்சருமான கே.என்.நேரு மற்றும் தெற்கு மாவட்ட செயலாளரும் பள்ளிக்கல்வித்துறை அமைச்சருமான அன்பில் மகேஷ் பொய்யாமொழி ஆகியோர் கலந்து கொண்டு, மாநாட்டுப் பணிகளை அதிகாரப்பூர்வமாகத் தொடங்கி வைத்தனர்.
தமிழ்நாட்டின் எதிர்கால அரசியலைத் தீர்மானிக்கும் மிக முக்கிய நிகழ்வாகக் கருதப்படும் இந்த மாநாட்டிற்காகச் சிறுகனூரில் நூற்றுக்கணக்கான ஏக்கர் பரப்பளவில் பிரம்மாண்டமான மேடை மற்றும் பந்தல் அமைக்கும் பணிகள் இனி போர்க்கால அடிப்படையில் நடைபெற உள்ளன. பந்தக்கால் நடும் இந்த முக்கிய நிகழ்வில், திமுகவின் முக்கியப் பிரதிநிதிகளான சட்டமன்ற உறுப்பினர்கள் காடுவெட்டி தியாகராஜன், பழனியாண்டி, செளந்திரபாண்டியன், ஸ்டாலின் குமார், கதிரவன் மற்றும் முன்னாள் எம்எல்ஏ அன்பில் பெரியசாமி ஆகியோர் முன்னிலை வகித்தனர். மேலும், மத்திய மாவட்ட செயலாளர் வைரமணி, திருச்சி மாநகராட்சி மேயர் அன்பழகன், கிழக்கு மாநகர செயலாளர் மதிவாணன், மாவட்ட துணைச் செயலாளர் முத்துச்செல்வம் உள்ளிட்டோர் பங்கேற்றுப் பணிகளை ஒருங்கிணைத்தனர்.
மாநாட்டின் வெற்றிக்கும், லட்சக்கணக்கான தொண்டர்களின் வருகைக்கும் தேவையான விரிவான ஏற்பாடுகளைச் செய்வதில் திமுக நிர்வாகிகள் தீவிரமாக ஈடுபட்டுள்ளனர். இந்தத் தொடக்க விழாவில் விஜய் ஜெயராஜ் மற்றும் கழக நிர்வாகிகள் சேர்மன் துரைராஜ், காஜாமலை விஜய், மாத்தூர் கருப்பையா, டோல்கேட் சுப்பிரமணி உட்பட ஒன்றிய செயலாளர்கள், பகுதி செயலாளர்கள் எனப் பெரும் திரளானோர் உற்சாகத்துடன் கலந்து கொண்டனர். மாநாட்டின் தலைப்பிற்கு ஏற்ப, தமிழக அரசின் சாதனைகளை விளக்கும் வகையிலும், வரும் தேர்தல் களத்திற்குத் தொண்டர்களைத் தயார்படுத்தும் வகையிலும் இந்த மாநாடு அமையும் என அமைச்சர்கள் நம்பிக்கை தெரிவித்தனர். சிறுகனூர் பகுதியில் இன்று பந்தக்கால் நடப்பட்டதைத் தொடர்ந்து, அப்பகுதியே திமுகவின் கொடிகளுடனும், தோரணங்களுடனும் விழாக்கோலம் பூண்டுள்ளது.
