தேனி மாவட்டம் பெரியகுளம் அருகே உள்ள பெரியகுளம் ஊராட்சி ஒன்றியத்திற்கு உட்பட்ட முதலக்கம்பட்டி ஊராட்சியில், நாட்டின் குடியரசு தினத்தை முன்னிட்டு சிறப்பு கிராம சபைக் கூட்டம் மிகுந்த எழுச்சியுடன் நடைபெற்றது. ஊராட்சி செயலர் எஸ். வீரபத்திரன் தலைமையில் நடைபெற்ற இந்த நிகழ்வில், கிராமத்தின் வளர்ச்சி மற்றும் அடிப்படைத் தேவைகள் குறித்து விரிவாக விவாதிக்கப்பட்டது. கூட்டத்தில் பெரியகுளம் ஊராட்சி ஒன்றிய உதவி பொறியாளர் மகேந்திரன் ஊராட்சி ஒன்றிய பார்வையாளராகக் கலந்துகொண்டு ஆலோசனைகளை வழங்கினார். மேலும், மகளிர் திட்ட அலுவலர்கள், காவல்துறை மற்றும் மின்சாரத் துறையைச் சேர்ந்த அதிகாரிகள் முன்னிலை வகித்து, பொதுமக்களின் நீண்டகாலக் கோரிக்கைகளை நேரடியாகக் கேட்டறிந்தனர். மக்களின் குறைகளுக்கு விரைவில் தீர்வு காணப்பட்டு உரிய நடவடிக்கை எடுக்கப்படும் என்று சம்பந்தப்பட்ட துறை அதிகாரிகள் கூட்டத்தில் உறுதி அளித்தனர்.
இந்த கிராம சபைக் கூட்டத்தில் கிராம மக்களின் வாழ்வாதாரத்தை மேம்படுத்தும் வகையிலான 20 முக்கிய தீர்மானங்கள் ஒருமனதாக நிறைவேற்றப்பட்டன. குறிப்பாக, நெடுஞ்சாலைத் துறையினரால் தற்போது மேற்கொள்ளப்பட்டு வரும் மேல்மங்கலம் – வைகைப்புதூர் சாலை விரிவாக்கப் பணிகளின் போது, ஏற்கனவே மண்ணுக்கு அடியில் இருக்கும் குடிநீர் பைப் லைன்கள் சேதமடைவதைத் தடுக்க, அந்தந்த ஒப்பந்ததாரர்களே உடைந்த குழாய்களைச் சரிசெய்து சாலை அமைக்க வேண்டும் என வலியுறுத்தப்பட்டது. மேலும், வடுகபட்டி கிராமத்திற்கு வைகை அணை பிக்கப் அணையிலிருந்து குடிநீர் குழாய் கொண்டு செல்லப்படும் வேளையில், வைகைப்புதூர் கிராமத்திற்கு எனத் தனியாக ஒரு குடிநீர் பாதையை (Line) அமைத்துக் கொடுத்துவிட்டு, அதன் பின்னரே இதர பணிகளை மேற்கொள்ள தமிழ்நாடு குடிநீர் வடிகால் வாரியத்தைக் கேட்டுக்கொள்ள மன்றம் ஒருமனதாக அங்கீகரித்தது. இது போன்ற 20-க்கும் மேற்பட்ட ஆக்கப்பூர்வமான தீர்மானங்கள் நிறைவேற்றப்பட்டது முதலக்கம்பட்டி கிராம மக்களிடையே மிகுந்த வரவேற்பைப் பெற்றுள்ளது.