குழந்தைகளின் ஆரம்பக்கால கல்விப் பயணத்தின் ஒரு முக்கிய மைல்கல்லாகக் கருதப்படும் மழலையர் பள்ளி பட்டமளிப்பு விழா, புதுக்கோட்டை மறைமலை நகரில் உள்ள யூரோ கிட்ஸ் (Euro Kids) மழலையர் பள்ளியில் மிகச் சிறப்பாக நடைபெற்றது. பள்ளி வளாகத்தில் நடைபெற்ற இந்த விழாவிற்கு, பள்ளியின் தாளாளர் கவிஞர் ஆர்.எம்.வீ. கதிரேசன் தலைமை தாங்கினார். மழலையர்களின் எதிர்கால கல்வி வாழ்விற்கு அடித்தளம் அமைக்கும் விதமாக ஏற்பாடு செய்யப்பட்டிருந்த இந்த நிகழ்வு, பெற்றோர்கள் மற்றும் ஆசிரியர்களிடையே பெரும் நெகிழ்ச்சியை ஏற்படுத்தியது.
விழாவின் தொடக்கமாகப் பள்ளியின் சென்டர் ஹெட் முத்துலெட்சுமி அனைவரையும் வரவேற்றுப் பேசினார். அதனைத் தொடர்ந்து, மழலையர் கல்வியை வெற்றிகரமாக முடித்த குட்டிப் பட்டதாரிகளுக்குப் பட்டங்களையும், சான்றிதழ்களையும் தாளாளர் கவிஞர் ஆர்.எம்.வீ. கதிரேசன் வழங்கி வாழ்த்துரை வழங்கினார். அப்போது அவர் பேசுகையில், “குழந்தைகளின் முதல் படிநிலைக் கல்வி என்பது அவர்களின் ஆளுமைத் திறனை வளர்ப்பதில் முக்கியப் பங்கு வகிக்கிறது. விளையாட்டும் கல்வியும் இணைந்த இத்தகைய சூழலில் வளர்ந்த குழந்தைகள், வருங்காலத்தில் சிறந்த குடிமக்களாகத் திகழ்வார்கள்” என்று குறிப்பிட்டார். பட்டங்களைப் பெற்றுக்கொண்ட மழலையர்கள், கருப்பு நிறப் பட்டமளிப்பு அங்கி அணிந்து உற்சாகத்துடன் காணப்பட்டனர்.
இந்த விழாவில் மாணவர்களின் பெற்றோர்கள், கல்வியாளர்கள் மற்றும் சமூக ஆர்வலர்கள் என ஏராளமானோர் கலந்து கொண்டு குழந்தைகளை வாழ்த்தினர். விழாவிற்கான அனைத்து ஏற்பாடுகளையும் பள்ளி ஆசிரியைகள் மற்றும் ஊழியர்கள் மிக நேர்த்தியாகச் செய்திருந்தனர். நவீனக் கல்வி முறையோடு, நற்பண்புகளையும் போதிக்கும் யூரோ கிட்ஸ் பள்ளியின் இந்த முயற்சிக்குச் சமூக ஆர்வலர்கள் பாராட்டு தெரிவித்தனர். விழாவின் நிறைவாக, குழந்தைகளின் கலை நிகழ்ச்சிகள் நடைபெற்று அனைவரையும் வியப்பில் ஆழ்த்தியது.