ஈரோடு மாவட்டம் பெருந்துறை சட்டமன்றத் தொகுதியில் திமுகவிற்குப் பலத்த பின்னடைவை ஏற்படுத்தும் வகையில், அக்கட்சியின் முக்கிய நிர்வாகிகள் மற்றும் தொண்டர்கள் ஒட்டுமொத்தமாக அண்ணா திராவிட முன்னேற்றக் கழகத்தில் தங்களை இணைத்துக் கொண்டனர். பெருந்துறை தொகுதிக்கு உட்பட்ட நிச்சாம்பாளையம் கிளை திமுக செயலாளர் கே.ஆர். சுப்பிரமணியம் தலைமையில், அக்கட்சியின் தீவிர விசுவாசிகளாக இருந்த சுமார் 200-க்கும் மேற்பட்டோர் திமுகவிலிருந்து விலகி, அதிமுகவின் கொள்கைகளால் ஈர்க்கப்பட்டு அக்கட்சியில் இணைந்தனர். பெருந்துறையில் நடைபெற்ற பிரம்மாண்ட தேர்தல் பிரச்சார பொதுக்கூட்டத்தில், அதிமுக பொதுச்செயலாளர் எடப்பாடி கே. பழனிசாமி பங்கேற்ற நிலையில், இந்த இணைப்பு நிகழ்வு அரசியல் வட்டாரத்தில் பெரும் பரபரப்பை ஏற்படுத்தியுள்ளது.
முன்னாள் அமைச்சரும் பவானி சட்டமன்ற உறுப்பினருமான கே.சி. கருப்பணன் மற்றும் பெருந்துறை சட்டமன்ற உறுப்பினர் ஜெயக்குமார் ஆகியோரின் ஒருங்கிணைப்பில் நடைபெற்ற இந்த நிகழ்வில், அதிமுகவில் இணைந்த அனைவருக்கும் எடப்பாடியார் முன்னிலையில் கட்சியின் அதிகாரப்பூர்வத் துண்டு அணிவித்து உற்சாக வரவேற்பு அளிக்கப்பட்டது. திமுக அரசின் மக்கள் விரோதப் போக்கு மற்றும் தேர்தல் வாக்குறுதி மீறல்களால் அதிருப்தி அடைந்து வெளியேறியதாகத் தெரிவித்த அவர்கள், “தமிழகத்தில் மீண்டும் பொற்கால ஆட்சியை வழங்க, வரும் 2026-ஆம் ஆண்டு சட்டமன்றத் தேர்தலில் எடப்பாடி கே. பழனிசாமி அவர்களை முதலமைச்சராக்க அயராது பாடுபடுவோம்” என அங்கிருந்த ஆயிரக்கணக்கான தொண்டர்கள் முன்னிலையில் எழுச்சிமிகு உறுதிமொழி எடுத்துக் கொண்டனர்.
இந்த முக்கிய இணைப்பு விழாவில் பெருந்துறை முன்னாள் சட்டமன்ற உறுப்பினர் டாக்டர் பொன்னுசாமி, ஈரோடு புறநகர் கிழக்கு மாவட்ட அதிமுக தலைவரும் முன்னாள் எம்எல்ஏவுமான கே.சி. பொன்னுதுரை, மாவட்ட எம்ஜிஆர் இளைஞரணி செயலாளர் வேட்டுவம்பாளையம் அருணாசலம் ஆகியோர் முன்னிலை வகித்தனர். மேலும், பெருந்துறை கிழக்கு ஒன்றிய செயலாளர் அருள்ஜோதி செல்வராஜ், மாவட்ட பொருளாளர் கே.பி.எஸ். மணி, பெருந்துறை அருக்காணி ஹோட்டல் உரிமையாளர் சுகுணா சத்தியன் உள்ளிட்ட முக்கிய நிர்வாகிகள் மற்றும் உள்ளாட்சிப் பிரதிநிதிகள் திரளாகக் கலந்துகொண்டு சிறப்பித்தனர். தேர்தல் நெருங்கும் வேளையில், பெருந்துறை போன்ற முக்கியத் தொகுதிகளில் திமுகவிலிருந்து நூற்றுக்கணக்கானோர் வெளியேறி அதிமுகவில் இணைவது, ஈரோடு மாவட்ட அரசியல் களத்தில் அதிமுகவின் பலத்தை மேலும் உறுதிப்படுத்தியுள்ளது.