மத்திய அரசு தமிழகத்திற்கு வழங்க வேண்டிய முறையான நிதிப் பகிர்வை வழங்காமல் புறக்கணித்த போதிலும், முதலமைச்சர் மு.க. ஸ்டாலின் மாநிலத்தின் உட்கட்டமைப்பு வளர்ச்சிக்குத் துணிச்சலுடன் கூடுதல் நிதி ஒதுக்கி மக்கள் நலத்திட்டங்களைச் செயல்படுத்தி வருவதாக மாநில நிதி மற்றும் மனிதவள மேலாண்மைத் துறை அமைச்சர் தங்கம் தென்னரசு தெரிவித்தார். விருதுநகர் மாவட்டம் சிவகாசியில் நடைபெற்ற அரசு விழாவில், சுமார் 103.6 கோடி ரூபாய் மதிப்பிலான பல்வேறு புதிய மேம்பாட்டுப் பணிகளுக்கு அவர் அடிக்கல் நாட்டிப் பேருரையாற்றினார்.
சிவகாசி மாநகராட்சிப் பகுதிகளின் போக்குவரத்து நெரிசலைக் குறைக்கும் வகையில், ரூ.45.6 கோடி மதிப்பிலான திருத்தங்கல் ரயில்வே மேம்பால கட்டுமானப் பணி மற்றும் ரூ.58 கோடி மதிப்பிலான இரண்டாம் கட்டச் சுற்றுச்சாலை அமைக்கும் பணி ஆகியவற்றை அமைச்சர் தங்கம் தென்னரசு பூமி பூஜை செய்து தொடங்கி வைத்தார். விழாவில் அவர் பேசுகையில், “ஏற்கனவே சாட்சியாபுரம் ரயில்வே மேம்பாலப் பணிகளை ஒப்பந்தக் காலத்திற்கு முன்பே முடித்துத் திறந்து வைத்தது இந்தத் திராவிட மாடல் அரசு. அதே வேகத்தில் திருத்தங்கல் மேம்பாலப் பணிகளும் விரைந்து முடிக்கப்படும். சிவகாசியின் வளர்ச்சிக்காகப் புதிய மாநகராட்சி அலுவலகம், பல்நோக்கு மாநாட்டுக் கூடம் எனப் பல்வேறு கட்டுமானங்கள் முழுவீச்சில் நடைபெற்று வருகின்றன” என்று குறிப்பிட்டார்.
மத்திய அரசின் நிதிப் பகிர்வு குறித்து அவர் கடும் விமர்சனங்களை முன்வைத்தார். “தமிழகத்தின் நிதி அமைச்சர் என்ற முறையில் நான் பலமுறை டெல்லிக்குச் சென்று மாநிலத்திற்குச் சேர வேண்டிய நிதி மற்றும் பேரிடர் நிவாரணத்தைக் கோரி வருகிறேன். தமிழகம் வழங்கும் வரி வருவாய்க்கு ஈடான நிதிப் பகிர்வு நமக்குத் திரும்பக் கிடைப்பதில்லை. இருப்பினும், மத்திய அரசு முட்டுக்கட்டைப் போட்டாலும் முதலமைச்சர் மு.க.ஸ்டாலின் தமிழகத்தின் வளர்ச்சியை எக்காரணம் கொண்டும் நிறுத்துவதில்லை. உட்கட்டமைப்புத் திட்டங்களுக்கு மாநில அரசே முன்னுரிமை அளித்து நிதியை விடுவித்து வருகிறது” என்று அவர் சாடினார்.
தமிழக அரசின் சமூக நலத்திட்டங்களைச் சுட்டிக்காட்டிய அமைச்சர், “சுமார் 1.15 கோடிக்கும் அதிகமான பெண்களுக்கு மாதம் 1,000 ரூபாய் கலைஞர் மகளிர் உரிமைத் தொகை வழங்கப்பட்டு வருகிறது. இது தவிர, விடியல் பயணம் எனும் இலவசப் பேருந்துத் திட்டம், அரசுப் பள்ளிகளில் பயின்ற மாணவிகளுக்கான ‘புதுமைப் பெண்’ ஊக்கத்தொகை மற்றும் காலை உணவுத் திட்டம் போன்றவை தமிழகத்தில் ஒரு சமூகப் புரட்சியையே ஏற்படுத்தியுள்ளன. விருதுநகர் மாவட்டத்தின் தொழில் மையமான சிவகாசி, தமிழகத்தின் பொருளாதார வளர்ச்சிக்கு ஆணிவேராக இருப்பதால், இத்தொகுதிக்கு முதலமைச்சர் தனி கவனம் செலுத்தி வருகிறார்” என்றார்.
இந்நிகழ்வில் சிவகாசி மாநகராட்சி மேயர் சங்கீதா இன்பம், சிவகாசி சட்டமன்ற உறுப்பினர் அசோகன், மாநகர திமுக செயலாளர் உதயசூரியன் மற்றும் பல்வேறு அரசுத் துறை அதிகாரிகள், உள்ளாட்சிப் பிரதிநிதிகள், பொதுமக்கள் திரளாகக் கலந்து கொண்டனர். சிவகாசியின் இரண்டாவது கட்டச் சுற்றுச்சாலை அமைப்பதன் மூலம் பட்டாசு மற்றும் அச்சுத் தொழில் நிறுவனங்களின் சரக்குப் போக்குவரத்து மேலும் எளிதாகும் எனத் தொழில்துறையினர் மகிழ்ச்சி தெரிவித்துள்ளனர்.
