தேனி பேருந்துநிலையத்தில் ஆட்டோநிறுத்தம் தொடர்பான மோதல் –8 ஆட்டோஓட்டுநர்கள் கைது,60க்கும் மேற்பட்டோர் தடுப்பில் கைது

தேனி பேருந்து நிலையத்தில் ஆட்டோ நிறுத்தம் தொடர்பான மோதல் – 8 ஆட்டோ ஓட்டுநர்கள் கைது, 60க்கும் மேற்பட்டோர் தடுப்பில் கைது
தேனி புதிய பேருந்து நிலையம் பகுதியில் பென்னிகுயிக் ஆட்டோ சங்கம் என்ற பெயரில் ஆட்டோ நிறுத்தம் செயல்பட்டு வருகிறது. இந்த ஆட்டோ நிறுத்தத்தைச் சேர்ந்த ஓட்டுநர்கள், பேருந்து நிலையத்திற்கு வரும் பயணிகளை ஏற்றிச் சென்று வருவது வழக்கம்.
இந்த ஆட்டோ நிறுத்தத்தில் மற்றொரு தரப்பினரும் ஆட்டோக்களை நிறுத்துவதால், இரு தரப்பினருக்கிடையே நீண்ட நாட்களாக பிரச்சனை நிலவி வந்தது. இதனால் பேருந்து நிலையம் பகுதியில் போக்குவரத்துக்கு இடையூறு ஏற்படுவதாகவும், அந்த இடத்தில் ஆட்டோ நிறுத்த அனுமதி இல்லை என்றும் கூறி, கடந்த சில நாட்களுக்கு முன்பு போலீசார் பேரிக்காடுகள் அமைத்து ஆட்டோ நிறுத்தத்தை அகற்ற நடவடிக்கை எடுத்தனர்.
இதனை எதிர்த்து ஆட்டோ ஓட்டுநர்கள் தேனி போலீசாருடன் வாக்குவாதத்தில் ஈடுபட்டனர். இதனைத் தொடர்ந்து அவர்கள் மீது தேனி காவல் நிலையத்தில் வழக்கு பதிவு செய்யப்பட்டது.
இந்த நிலையில், போலீசாரின் தடையை மீறி மீண்டும் ஆட்டோ நிறுத்தியதாக கூறி, 8 ஆட்டோ ஓட்டுநர்களின் ஆட்டோக்களை பறிமுதல் செய்த போலீசார் அவர்களை கைது செய்தனர். மேலும் 20க்கும் மேற்பட்டோர் மீது வழக்கு பதிவு செய்யப்பட்டது.
இதனைத் தொடர்ந்து கைது செய்யப்பட்ட நபர்களை விடுவிக்கக் கோரி ஏராளமான ஆட்டோ ஓட்டுநர்கள் தேனி காவல் நிலையத்தை முற்றுகையிட்டு போலீசாருடன் கடும் வாக்குவாதத்தில் ஈடுபட்டனர். இதனால் பதற்றம் ஏற்பட்டதையடுத்து, தேனி காவல் நிலையத்தில் டிஎஸ்பி தலைமையில் கூடுதல் போலீசார் குவிக்கப்பட்டனர்.
போலீசார் மற்றும் ஆட்டோ ஓட்டுநர்களிடையே பேச்சுவார்த்தை நடைபெற்றும், வாக்குவாதம் தொடர்ந்ததால், காவல் நிலையத்தில் கலவரத்தில் ஈடுபட்டதாக கூறி சுமார் 61 ஆட்டோ ஓட்டுநர்களை போலீசார் கைது செய்தனர். பின்னர் அவர்களை தனியார் மண்டபத்தில் தங்கவைத்து விசாரணை மேற்கொண்டனர். இதனால் அந்த பகுதியில் பெரும் பரபரப்பு ஏற்பட்டது.
இதனிடையே, கைது செய்யப்பட்ட ஆட்டோ ஓட்டுநர்களின் குடும்பத்தினர் காவல் நிலையத்திற்கு வந்து தங்கள் ஆதங்கத்தை வெளிப்படுத்தினர். தங்கள் குடும்பத்தின் வாழ்வாதாரம் பாதிக்கப்பட்டுள்ளதாகவும், கைது செய்யப்பட்டவர்களை உடனடியாக விடுவிக்க வேண்டும் என்றும் கோரிக்கை வைத்தனர்.
சம்பவம் குறித்து ஆட்டோ ஓட்டுநர்கள் கூறுகையில், கடந்த 13 ஆண்டுகளாக முறையான பதிவு பெற்று இந்த ஆட்டோ நிறுத்தத்தில் பயணிகளை ஏற்றிச் சென்று வருவதாக தெரிவித்தனர். இந்த நிலையில் பிரச்சனை ஏற்படுத்திய மற்றொரு தரப்பினர்மீது நடவடிக்கை எடுக்காமல், போலீசார் ஒருதலைப்பட்சமாக தங்கள் சங்கத்தை சேர்ந்த ஓட்டுநர்கள்மீது மட்டும் நடவடிக்கை எடுத்துள்ளதாக குற்றம்சாட்டினர்.
இதனால் கடந்த சில நாட்களாக ஆட்டோ ஓட்ட முடியாமல் தங்களது வாழ்வாதாரம் கடுமையாக பாதிக்கப்பட்டு வருவதாகவும், கைது செய்யப்பட்ட தங்கள் சங்கத்தை சேர்ந்த ஆட்டோ ஓட்டுநர்களை உடனடியாக விடுவிக்க வேண்டும் என்றும் அவர்கள் வலியுறுத்தினர்.
இதற்கிடையே, சம்பவ இடத்திற்கு போக்குவரத்து துறை மற்றும் வருவாய் துறை அதிகாரிகளும் வருகை தந்து நிலைமையை ஆய்வு செய்தனர். பேருந்து நிலையம் பகுதியில் போக்குவரத்து நெரிசல் அதிகரித்து வருவதால், நிரந்தர தீர்வு காண உரிய இடத்தில் முறையான ஆட்டோ நிறுத்தம் அமைக்க நடவடிக்கை எடுக்கப்படும் என அதிகாரிகள் தெரிவித்தனர்.
ஆட்டோ ஓட்டுநர்கள் சங்க நிர்வாகிகள் கூறுகையில், இந்த பிரச்சனைக்கு நிரந்தர தீர்வு காண மாவட்ட நிர்வாகம், காவல்துறை மற்றும் ஆட்டோ சங்க பிரதிநிதிகள் இணைந்து பேச்சுவார்த்தை நடத்த வேண்டும் என்றும், ஒருதலைப்பட்ச நடவடிக்கைகளை தவிர்க்க வேண்டும் என்றும் வலியுறுத்தினர்.
தேனி புதிய பேருந்து நிலையம் பகுதியில் ஆட்டோ ஓட்டுநர்கள் மற்றும் காவல்துறையினருக்கிடையே ஏற்பட்ட இந்த மோதல், நகரில் பெரும் பரபரப்பை ஏற்படுத்தியுள்ள நிலையில், அப்பகுதியில் கூடுதல் போலீசார் பாதுகாப்பு பணியில் ஈடுபடுத்தப்பட்டுள்ளனர். நிலைமை தற்போது கட்டுப்பாட்டில் இருப்பதாகவும், சட்டம்-ஒழுங்கு பிரச்சனை ஏற்படாமல் தேவையான நடவடிக்கைகள் எடுக்கப்படும் என்றும் காவல்துறை தெரிவித்துள்ளது