கோவை மாவட்ட ஆட்சியர் அலுவலகக் கூட்டரங்கில், குறு, சிறு மற்றும் நடுத்தரத் தொழில் நிறுவனங்கள் துறை (MSME) சார்பில் கைவினைத் தொழில்களை ஊக்குவிப்பதற்கான சிறப்பு நிகழ்ச்சி நடைபெற்றது. சுயதொழில் மூலம் பொருளாதார முன்னேற்றம் அடைய விரும்பும் இளைஞர்கள் மற்றும் கைவினைஞர்களுக்குத் தேவையான திறன் மேம்பாட்டுப் பயிற்சிகள் மற்றும் நிதி உதவிகளை வழங்கும் நோக்கில் இந்த விழா ஒருங்கிணைக்கப்பட்டது. இந்நிகழ்வில் கோவை மாவட்ட ஆட்சித்தலைவர் பவன்குமார் கிரியப்பனவர் மற்றும் கோவை நாடாளுமன்ற உறுப்பினர் கணபதி ப. ராஜ்குமார் ஆகியோர் சிறப்பு விருந்தினர்களாகக் கலந்துகொண்டு பயாளிகளுக்கு நலத்திட்ட உதவிகளை வழங்கினர்.
பல்வேறு கைவினைத் தொழில்களில் அரசு சார்பில் வழங்கப்பட்ட நவீன திறன் மேம்பாட்டுப் பயிற்சியை வெற்றிகரமாக நிறைவு செய்த 12 பேருக்கு, அதற்கான அங்கீகாரச் சான்றிதழ்களை எம்பி மற்றும் கலெக்டர் வழங்கினர். இதனைத் தொடர்ந்து, கைவினைத் தொழிலைத் தொடங்கித் தங்களின் வாழ்வாதாரத்தை உயர்த்திக்கொள்ள முன்வந்த 4 பயனாளிகளுக்கு, மொத்தம் ரூ. 10.50 லட்சம் மதிப்பிலான கடன் பெறுவதற்கான வங்கி ஒப்பளிப்பு ஆணைகளை (Sanction Orders) அவர்கள் வழங்கினர். இத்தகைய கடனுதவிகள் மூலம் கைவினைஞர்கள் தங்களுக்குத் தேவையான உபகரணங்களை வாங்கவும், தொழில் கூடங்களை விரிவுபடுத்தவும் முடியும் என்பது குறிப்பிடத்தக்கது.
இந்த விழாவில் பேசிய அதிகாரிகள், பாரம்பரியக் கலைகள் மற்றும் கைவினைத் தொழில்கள் அழியாமல் பாதுகாக்கப்பட வேண்டும் என்றும், தற்காலச் சந்தைக்கேற்ப நவீனத் தொழில்நுட்பங்களைப் பயன்படுத்திப் பொருட்களைத் தயாரிப்பதன் மூலம் உலக அளவில் சந்தை வாய்ப்புகளைப் பெற முடியும் என்றும் தெரிவித்தனர். அரசு வழங்கும் மானியத்துடன் கூடிய கடன் திட்டங்களை உரிய முறையில் பயன்படுத்திப் புதிய தொழில் முனைவோராக இளைஞர்கள் உருவாக வேண்டும் என்று வலியுறுத்தப்பட்டது.
இந்நிகழ்ச்சியில் மாவட்ட தொழில் மையத்தின் (DIC) பொது மேலாளர் பா. சண்முகசிவா, தொழிற் கூட்டுறவு உதவி இயக்குநர் சுகந்தி, தொழில்நுட்ப உதவி இயக்குநர் ராஜேஸ்வரி ஆகியோர் முன்னிலை வகித்தனர். மேலும், உதவிப் பொறியாளர்கள் புவனேஸ்வரன், ரக்ஷ்னா, மாவட்ட முன்னோடி வங்கி மேலாளர் ஜிதேந்திரகுமார் மற்றும் தாய்கோ வங்கி கோவை மண்டல மேலாளர் அருணாதேவி உள்ளிட்ட முக்கிய அதிகாரிகள் பலர் கலந்துகொண்டு சிறப்பித்தனர். மாவட்ட நிர்வாகத்தின் இந்த அதிரடி நடவடிக்கை கோவை மாவட்டத்தில் உள்ள குறு மற்றும் சிறு தொழில் முனைவோரிடையே பெரும் உற்சாகத்தை ஏற்படுத்தியுள்ளது.
