சர்வதேச சுற்றுலாத்தலமான கொடைக்கானல் வன உயிரின சரணாலயப் பகுதியில், சட்டவிரோதமாக மரங்களைக் கடத்திய புகாரில் வனத்துறையைச் சேர்ந்த நால்வர் பணியிடை நீக்கம் செய்யப்பட்டுள்ள சம்பவம், திண்டுக்கல் மாவட்டத்தில் பெரும் அதிர்வலைகளை ஏற்படுத்தியுள்ளது. பாதுகாக்கப்பட்ட வனப்பகுதியில் ‘வேலியே பயிரை மேய்ந்த கதையாக’ அதிகாரிகளே இந்த முறைகேட்டில் ஈடுபட்டிருப்பது பல்வேறு மர்மங்களை உருவாக்கியுள்ளது.
மலைகளின் இளவரசியான கொடைக்கானலில் பல்லுயிர் பெருக்கத்தைப் பாதுகாக்கவும், சுற்றுச்சூழலை மேம்படுத்தவும் அந்நிய மரங்களான யூகலிப்டஸ், வாட்டில் போன்றவற்றை அகற்றி, அவ்விடத்தில் பழமையான சோலை மரங்களை நட்டு புல்வெளிகளை உருவாக்க உயர் நீதிமன்றம் மற்றும் உச்ச நீதிமன்றம் சில ஆண்டுகளுக்கு முன் வழிகாட்டுதல்களை வழங்கியது. இந்த விதியின்படி, வெட்டப்படும் அந்நிய மரங்களை வனப்பகுதியை விட்டு வெளியே கொண்டு செல்லவோ அல்லது விற்பனை செய்யவோ கூடாது. அவை அந்தந்த இடத்திலேயே மக்கிப் போய், மண்ணுக்கு உரமாகவும் சிறிய உயிரினங்கள் பெருகவும் வழிவகை செய்யப்பட வேண்டும் என்பதே இயற்கை ஆர்வலர்களின் எதிர்பார்ப்பும் சட்டமுமாகும்.
ஆனால், இந்தச் சட்ட விதிகளைத் துஷ்பிரயோகம் செய்த சில வனத்துறை அதிகாரிகள், மரங்களை ரகசியமாக விற்பனைக்குக் கடத்தியதாகப் புகார் எழுந்தது. இது குறித்து வனத்துறை நுண்ணறிவுப் பிரிவு மற்றும் வனச் சிறப்புப் படை அதிகாரிகள் தீவிர ஆய்வு மேற்கொண்டனர். இந்த ரகசிய ஆய்வில், மன்னவனூர் மற்றும் பேரிஜம் செல்லும் வழியில் உள்ள வனக் காப்புக்காடு பகுதிகளில் சுமார் இரண்டாயிரத்திற்கும் மேற்பட்ட மரங்கள், வனத்துறையினரின் நேரடி உடந்தையுடன் வெட்டி கடத்தப்பட்டிருப்பது உறுதி செய்யப்பட்டது.
இந்த முறைகேடு அம்பலமானதைத் தொடர்ந்து, திண்டுக்கல் கோட்ட வனப்பாதுகாவலர் அதிரடி நடவடிக்கை மேற்கொண்டு, இக்கடத்தலில் தொடர்புடையதாகக் கருதப்படும் வனத்துறையினர் நால்வரைப் பணியிடை நீக்கம் (Suspension) செய்து உத்தரவிட்டுள்ளார். எனினும், சரணாலயப் பகுதியில் இருந்து கடத்தப்பட்ட மரங்களின் உண்மையான மதிப்பு எவ்வளவு? அவை எங்கே கொண்டு செல்லப்பட்டன? இந்தச் சங்கிலித் தொடர் முறைகேட்டில் இன்னும் பெரிய அதிகாரிகளுக்குப் பங்கு இருக்கிறதா? போன்ற கேள்விகளுக்கு இதுவரை முறையான பதில் கிடைக்கவில்லை.
சஸ்பெண்ட் செய்யப்பட்ட நால்வருடன் இந்த விவகாரம் முடிந்துவிடக் கூடாது என்றும், ஒரு உயர்மட்டக் குழு அமைத்து முழுமையான விசாரணை நடத்தி, கடத்தப்பட்ட மரங்களை மீட்க வேண்டும் என்றும் சூழலியல் ஆர்வலர்கள் வலியுறுத்தி வருகின்றனர். வனத்தைப் பாதுகாக்க வேண்டியவர்களே அதன் அழிவுக்குக் காரணமாக இருப்பது, கொடைக்கானலின் இயற்கைச் சமநிலையைச் சிதைக்கும் செயலாகப் பார்க்கப்படுகிறது.
