திண்டுக்கல் மாவட்டம் கொடைக்கானலில் பிரசித்தி பெற்ற சுற்றுலாத் தலமாகவும், முக்கிய ஆன்மீகத் திருத்தலமாகவும் விளங்கும் குறிஞ்சி ஆண்டவர் முருகன் கோயிலில், கார்த்திகை திருநாளை முன்னிட்டு 20 அடி உயர பிரம்மாண்ட சொக்கப்பனை கொளுத்தும் வைபவம் கோலாகலமாக நடைபெற்றது. இதில், உள்ளூர் மக்களும், திரளான சுற்றுலாப் பயணிகளும் கலந்து கொண்டு முருகப்பெருமானை அரோகரா கோஷத்துடன் தரிசித்துச் சென்றனர்.
மலைகளின் இளவரசியான கொடைக்கானலில், பழனி தண்டாயுதபாணி சுவாமி கோயிலின் கட்டுப்பாட்டின் கீழ் குறிஞ்சி ஆண்டவர் முருகன் கோயில் அமைந்துள்ளது. ஆண்டுதோறும் கார்த்திகை மாதம் வரும் தீபத் திருநாளை ஒட்டி இங்குச் சிறப்பான வழிபாடுகளும், விமரிசையான வைபவங்களும் நடைபெறுவது வழக்கம். அதன்படி, இன்று கார்த்திகை திருநாளை முன்னிட்டு, முருகப்பெருமானுக்குச் சிறப்பு அபிஷேகங்கள், அலங்காரங்கள் மற்றும் ஆராதனைகள் நடைபெற்றன.
பூஜைகளைத் தொடர்ந்து, முக்கிய நிகழ்வான சொக்கப்பனை கொளுத்தும் வைபவம் அரங்கேறியது. பனை ஓலைகள் மற்றும் வைக்கோல்களைப் பயன்படுத்தி சுமார் 20 அடி உயரத்தில் பிரம்மாண்டமாக அமைக்கப்பட்டிருந்த சொக்கப்பனைக்குச் சிறப்பு பூஜைகள் செய்யப்பட்டன. தீய சக்திகளை அழித்து, மக்களின் உள்ளங்களிலும், இல்லங்களிலும் ஒளியும் நன்மையும் பிறக்க வேண்டும் என்ற நோக்கத்துடன் இந்தச் சொக்கப்பனை மங்களகரமாகக் கொளுத்தப்பட்டது.
பிரம்மாண்ட சொக்கப்பனை கொழுந்து விட்டு எரிந்தபோது, அங்குத் திரண்டிருந்த ஆயிரக்கணக்கான பக்தர்களும், சுற்றுலாப் பயணிகளும் பக்திப் பரவசத்துடன் ‘அரோகரா’ கோஷமிட்டு சுவாமியை வழிபட்டனர். இதனையடுத்து, முருகப்பெருமான் ராஜா அலங்காரத்தில் பக்தர்களுக்குக் காட்சியளித்தார். சொக்கப்பனை வானுயர எரியும் அதே நேரத்தில், கோயில் கோபுரத்தின் மேற்பகுதியில் முழு நிலவு காட்சியளித்தது. இந்த இரண்டு அற்புதக் காட்சிகளும் ஒருசேரப் பார்ப்பவர்களைப் பரவசப்படுத்தி, அங்குள்ள ஆன்மீகச் சூழலை மேலும் மெருகூட்டின. முருகப்பெருமானின் தரிசனமும், சொக்கப்பனை ஒளியும் கொடைக்கானல் மலைப் பிரதேசத்தை ஒளிமயமாக ஆக்கின.