சென்னை : ‘ஓரணியில் தமிழ்நாடு’ இயக்கத்தில் இணைந்துள்ள 1 கோடி குடும்பங்கள் வரும் செப்டம்பர் 15 ஆம் தேதி, “தமிழ்நாட்டை தலைகுனிய விடமாட்டோம்” என உறுதிமொழி ஏற்கவுள்ளதாக முதலமைச்சர் மு.க. ஸ்டாலின் தெரிவித்துள்ளார்.
இதுதொடர்பாக தனது சமூக வலைத்தளப் பதிவில் முதலமைச்சர் ஸ்டாலின் கூறியிருப்பதாவது :
“தமிழ்நாட்டின் மண், மொழி, மானம் காக்க ‘ஓரணியில் தமிழ்நாடு’ இயக்கத்தில் ஒரு கோடிக்கும் மேற்பட்ட குடும்பங்கள் இணைந்துள்ளனர். அண்ணா பிறந்த நாளான செப்டம்பர் 15 அன்று, தமிழ்நாட்டின் 68,000க்கும் மேற்பட்ட பூத் வாரியாக அவர்கள் உறுதிமொழி எடுக்க உள்ளனர்.
அந்த உறுதிமொழியில்,
தமிழ்நாட்டை தலைகுனிய விடமாட்டேன் என ஒற்றுமையுடன் வலியுறுத்தப்படும்.
நாடாளுமன்றத் தொகுதிகளின் விகிதாசாரத்தை குறைக்கும் அநியாயமான தொகுதி மறுவரையறைக்கு எதிராக போராடுவோம்.
வாக்காளர் பட்டியல் மோசடி மூலம் மக்களின் வாக்குரிமையை பறிக்கும் #SIR-க்கு எதிராக நிற்போம்.
நீட் மற்றும் இளைஞர்களின் கல்வி வாய்ப்புகளை தடுக்கும் எந்த திட்டத்தையும் எதிர்த்து, கல்வி நிதிக்காகப் போராடுவோம்.
தமிழ் மொழி, பண்பாடு, பெருமைக்கு எதிரான பாகுபாடுகளை எதிர்த்துப் போராடுவோம்.
பெண்கள், விவசாயிகள், மீனவர்கள், நெசவாளர்கள், தொழிலாளர்கள் ஆகியோரின் நலனுக்காகத் தேவையான நிதி பெற்றுத் தர பாடுபடுவோம்.
எதற்காகவும் தமிழ்நாட்டை தலைகுனிய விடமாட்டோம் என உறுதி ஏற்கிறோம்,” என்று முதலமைச்சர் ஸ்டாலின் பதிவில் வலியுறுத்தியுள்ளார்.
