கரூர் மாவட்டம் குளித்தலை அருகே வாரிசு சான்றிதழ் வழங்குவதற்காக லஞ்சம் பெற்ற கிராம நிர்வாக அலுவலர் (விஏஓ) ஒருவரை லஞ்ச ஒழிப்புப் போலீசார் கையும் களவுமாகக் கைது செய்தனர். கரூர் மாவட்டம், குளித்தலை அருகே உள்ள மகாதானபுரம் கிராமத்தைச் சேர்ந்தவர் சதீஷ் (36). இவர் கட்டுமான வேலை பார்த்து வருகிறார்.
சதீஷின் தாயார் வீரம்மாள் காலமான நிலையில், அவர் தனது தாயாரின் வாரிசு சான்றிதழைப் பெறுவதற்காகக் கிருஷ்ணராயபுரம் வட்டாட்சியர் அலுவலகத்தை அணுகியுள்ளார்.அப்போது, மகாதானபுரம் வடக்கு கிராம நிர்வாக அலுவலர் (விஏஓ) பிரபு (46) என்பவர் சான்றிதழை வழங்குவதற்காக சதீஷிடம் ரூ.3,000 லஞ்சமாகக் கேட்டுள்ளார்.
லஞ்சம் கொடுக்க விரும்பாத சதீஷ், உடனடியாகக் கரூர் லஞ்ச ஒழிப்புப் போலீசாரிடம் புகார் அளித்தார். லஞ்ச ஒழிப்புப் போலீசார், ரசாயனம் தடவிய ரூ.3,000 நோட்டுக்களைச் சதீஷிடம் கொடுத்து, அவற்றைப் பிரபுவிடம் கொடுக்குமாறு அறிவுறுத்தினர். அதன்படி, சதீஷ் வட்டாட்சியர் அலுவலகத்தில் இருந்த விஏஓ பிரபுவிடம் பணத்தைக் கொடுத்தபோது, அங்கே மறைந்திருந்த லஞ்ச ஒழிப்புப் போலீசார் பிரபுவை கையும் களவுமாகப் பிடித்து கைது செய்தனர்.
வாரிசு சான்றிதழ் போன்ற அத்தியாவசிய அரசுச் சேவைகளுக்கும் லஞ்சம் கேட்கும் அரசு ஊழியர்கள் மீது எடுக்கப்பட்ட இந்தக் கடுமையான நடவடிக்கை, அரசு அலுவலகங்களில் நடைபெறும் ஊழலை ஒழிக்க மேற்கொள்ளப்படும் முயற்சியின் ஒரு பகுதியாகக் கருதப்படுகிறது.
