இது நம்ம ஆட்டம்… பதக்க வேட்டையில் சேலம் இளைஞர்கள்… விளையாட்டுத் திருவிழாவைத் தொடங்கி வைத்தார் அமைச்சர் ராஜேந்திரன்!

சேலம் மாநகராட்சி மகாத்மா காந்தி விளையாட்டரங்கத்தில், “இது நம்ம ஆட்டம்” என்ற எழுச்சியான பெயரில் முதலமைச்சர் இளைஞர் விளையாட்டுத் திருவிழாவின் மாவட்ட அளவிலான போட்டிகள் வெள்ளிக்கிழமை கோலாகலமாகத் தொடங்கின. இந்த விளையாட்டுப் பெருவிழாவை, மாவட்ட ஆட்சியர் இரா. பிருந்தாதேவி முன்னிலையில் சுற்றுலாத் துறை அமைச்சர் இரா. ராஜேந்திரன் கொடியசைத்துத் தொடங்கி வைத்தார். விழாவில் பேசிய அமைச்சர், தமிழக முதலமைச்சர் மற்றும் துணை முதலமைச்சர் ஆகியோரின் சீரிய தலைமையில் இளைய தலைமுறையினரின் உடல் மற்றும் மன வளர்ச்சியை மேம்படுத்தும் நோக்கில் விளையாட்டுத் துறையில் எண்ணற்ற புதிய முயற்சிகள் முன்னெடுக்கப்பட்டு வருவதாகத் தெரிவித்தார். பொதுமக்கள் மற்றும் இளைஞர்கள் விளையாட்டுத் துறையில் தங்களது மறைந்திருக்கும் திறமைகளை வெளிக்கொணர வேண்டும் என்பதே இத்தகைய திருவிழாக்களின் முக்கிய நோக்கம் என்றும் அவர் குறிப்பிட்டார்.

சேலம் மாவட்டத்தில் கடந்த ஜனவரி 25-ஆம் தேதி தொடங்கிய வட்டார அளவிலான போட்டிகளில், 20 ஊராட்சி ஒன்றியங்களைச் சேர்ந்த 9,314 வீரர்கள் மற்றும் 6,522 வீராங்கனைகள் எனப் பெரும் திரளானோர் பங்கேற்றுத் தங்களது விளையாட்டுத் திறனை நிரூபித்தனர். அந்தப் போட்டிகளில் முதலிடம் பிடித்து சாதனை படைத்த 960 வீரர்கள் மற்றும் 960 வீராங்கனைகள் தற்போது நடைபெற்று வரும் மாவட்ட அளவிலான போட்டிகளில் பங்கேற்று வருகின்றனர். முதல் நாளான இன்று 100 மீட்டர் தடகளம், குண்டெறிதல், கேரம் (இரட்டையர்), கபடி, பெண்களுக்கான த்ரோபால் மற்றும் இருபாலருக்குமான கயிறு இழுத்தல் போன்ற போட்டிகள் விறுவிறுப்பாக நடைபெற்றன. இதனைத் தொடர்ந்து, நாளை ஜனவரி 31-ஆம் தேதி ஆண்களுக்கான ஸ்ட்ரீட் கிரிக்கெட், வாலிபால், ஓவியம் மற்றும் கோலப்போட்டிகளுடன், மாற்றுத்திறனாளிகளுக்கான சிறப்புப் போட்டிகளும் நடத்தப்பட உள்ளன.

மாவட்ட அளவிலான இந்தப் போட்டிகளில் வெற்றி பெற்று முதல் மூன்று இடங்களைப் பிடிக்கும் வீரர்களுக்கு முறையே ரூ.6,000, ரூ.4,000 மற்றும் ரூ.2,000 பரிசுத்தொகையாக வழங்கப்பட உள்ளது. குறிப்பாக, கபடி (பெண்கள்) மற்றும் ஸ்ட்ரீட் கிரிக்கெட் (ஆண்கள்) போட்டிகளில் முதலிடம் பெறும் மாவட்ட அணிகள், மாநில அளவிலான போட்டிகளுக்குத் தகுதி பெற்றுச் சேலம் மாவட்டத்தின் பெருமையை நிலைநாட்ட உள்ளன. மாநிலப் போட்டிகளில் வெற்றி பெறுவோருக்கு ரூ.75,000 வரை உயரிய பரிசுத்தொகை வழங்கப்பட உள்ளது இளைஞர்களிடையே பெரும் உற்சாகத்தை ஏற்படுத்தியுள்ளது. இந்தத் தொடக்க விழாவில் சேலம் மாநகராட்சி மேயர் ராமச்சந்திரன், மேட்டூர் சட்டமன்ற உறுப்பினர் எஸ்.சதாசிவம், துணை மேயர் மா.சாரதாதேவி, மாவட்ட விளையாட்டு அலுவலர் சிவரஞ்சன் உள்ளிட்ட அரசு அலுவலர்கள் பலர் கலந்துகொண்டு வீரர்களை ஊக்குவித்தனர்.