நடிகர் விஜய் அரசியலுக்கு நுழைந்த பிறகு அரசியல் நிலைப்பாடுகளைப் பகிர்ந்து வரும் நிலையில், விடுதலைச் சிறுத்தைகள் கட்சித் தலைவர் திருமாவளவன் இன்று புதிய கேள்வியுடன் கருத்து தெரிவித்துள்ளார்.
சென்னையில் நிருபர்களை சந்தித்த அவர் கூறியதாவது :
“செயற்குழு கூட்டத்தில் விஜய், தி.மு.க., மற்றும் பா.ஜ., குறித்து மட்டும் விமர்சனம் செய்து இருக்கிறார். ஆனால், அ.தி.மு.க., குறித்து எந்தவிதமான கொள்கை விமர்சனமும் அவர் உரையில் வெளிப்படையாக இல்லை. இதனால், ‘அ.தி.மு.க., விஜய்க்கு கொள்கை எதிரியா இல்லையா?’ என்ற சந்தேகம் எழுகிறது.”
“தி.மு.க. ஆளுங்கட்சி என்பதால் அதனை விமர்சிப்பது இயல்பாக இருக்கலாம். ஆனால், அரசியல் வட்டத்தில் அ.தி.மு.க.வும் முக்கிய எதிர்க்கட்சியாக இருக்கிறது. அவர்களும் ஒரு கொள்கைப் பிம்பத்துடன் செயல்படுகிறார்கள். எனவே விஜய் அதைப் பற்றி ஏன் மௌனமாக இருக்கிறார் என்பது ஒரு கேள்வியாக உள்ளது,” என அவர் குறிப்பிட்டார்.
மேலும், “பரந்தூர் விவகாரத்தில் விஜய் மக்களின் பார்வையை பிரதிநிதித்துவப்படுத்தி போராடுகிறார் என்றால், அதனை நாங்களும் வரவேற்கிறோம்,” என்றும் திருமாவளவன் தெரிவித்தார்.
