தேனி மாவட்ட நிர்வாகத்தின் சார்பில் மிகப்பிரம்மாண்டமாக நடைபெற்று வரும் புத்தகத் திருவிழா, அறிவுப்பசியைத் தீர்க்கும் நல்வாய்ப்பாகத் தொடர்ந்து ஐந்தாம் நாளை எட்டியுள்ளது. இன்றைய நிகழ்விற்கு மாவட்ட ஆட்சித் தலைவர் ரஞ்ஜீத்சிங் தலைமை தாங்கினார். மாவட்ட வருவாய் அலுவலர் (D.R.O) ராஜகுமார், உத்தமபாளையம் கோட்டாட்சியர் செய்யது முகமது, செய்தி மக்கள் தொடர்பு அலுவலர் நல்லதம்பி மற்றும் மகளிர் திட்ட இயக்குநர் சந்திரா ஆகியோர் முன்னிலை வகித்தனர். புத்தகங்கள் வெறும் காகிதங்கள் அல்ல, அவை மனித வாழ்வின் வழிகாட்டிகள் என்பதை உணர்த்தும் வகையில் இன்றைய கருத்தரங்கம் அமைந்தது.
சிறப்பு விருந்தினராகக் கலந்துகொண்டு சென்னை மாநகராட்சி சுகாதார இணை ஆணையர் ஜெயசீலன் அவர்கள் உரையாற்றினார். சங்க இலக்கியம் முதல் தற்காலப் பொருளாதாரச் சிக்கல்கள் வரை அவர் தொட்டுச் சென்ற விதம் வாசகர்களை வெகுவாகக் கவர்ந்தது. அவர் பேசுகையில், “மனிதனாகப் பிறந்தவர்கள் தவறு செய்வது இயல்புதான்; ஆனால், அந்தத் தவறுகளைத் திருத்திக் கொண்டு நல்வழிப்பட மணிமேகலை காப்பியம் நமக்கு உன்னதமான வாய்ப்புகளை வழங்குகிறது. வாழ்க்கைப் பயணம் என்பது இன்பமும், துன்பமும் கலந்தது. இவை ஒரு நாணயத்தின் இரு பக்கங்களைப் போன்றவை. இதில் துன்பங்களைக் கடந்து, இன்பங்களை மட்டும் மனதார ஏற்றுக்கொள்வதே உண்மையான புத்திசாலித்தனம் என்று புறநானூறு அழகாகக் குறிப்பிடுகிறது” எனத் தத்துவார்த்தமாக விளக்கினார்.
தொடர்ந்து வாழ்வின் எதார்த்தங்களை விவரித்த அவர், “மனிதன் தன் வாழ்நாளில் தவறவிட்ட வாய்ப்புகளை நினைத்துத் தீராத குற்ற உணர்ச்சியுடனேயே மடிகிறான். உண்மையில் மயானம் என்பது இறந்தவர்களுக்கு ஒரு அமைதியான நிம்மதியைத் தருகிறது. ஆனால், அந்த இறுதிச் சடங்கில் பங்கேற்கும் உயிருடன் இருப்பவர்களுக்கு அது ஒரு கணம் வாழ்வின் நிலையாமையை உணர்த்தி, சிறு ஞானத்தை வழங்குகிறது” என்று ஆழமான கருத்துக்களைப் பகிர்ந்தார்.
மேலும், தனது பணி அனுபவங்களைக் கொண்டு சமூகப் பொருளாதாரச் சிக்கல்களைப் பற்றிப் பேசுகையில், “நான் விருதுநகர் மாவட்ட ஆட்சியராக இருந்தபோது ஒரு கள ஆய்வு மேற்கொண்டோம். மகளிர் சுயஉதவிக் குழுக்களுக்கு வழங்கப்படும் கடன் தொகையில் 40 சதவீதத்தினர் மட்டுமே அதனைத் தொழில் முதலீடாக மாற்றி முன்னேறுகின்றனர். எஞ்சிய சிலர் அந்தப் பணத்தில் நகைகளை வாங்குகின்றனர். காலப்போக்கில் அந்த நகைகள் சீர் வரிசைகள், மருத்துவச் செலவுகள் அல்லது கல்விக்காக அடகு வைக்கப்படுகின்றன. அவ்வாறு அடகு வைக்கப்படும் நகைகளில் பெரும்பாலானவை மீட்கப்படாமலேயே போய்விடுகின்றன என்பதுதான் கசப்பான வரலாறு” என்று எதார்த்த நிலைமையைச் சுட்டிக்காட்டினார்.
புத்தகத் திருவிழாவின் ஒரு பகுதியாகப் பள்ளி மற்றும் கல்லூரி மாணவர்களிடையே வாசிப்புப் பழக்கத்தை ஊக்குவிக்கும் வகையில் பல்வேறு போட்டிகளும், கலை நிகழ்ச்சிகளும் நடைபெற்றன. மாவட்டத்தின் பல பகுதிகளில் இருந்தும் ஆயிரக்கணக்கான வாசகர்கள் திரண்டு வந்து தங்களுக்குப் பிடித்தமான புத்தகங்களை வாங்கிச் சென்றனர். அறிவுப் பகிர்வும், வாழ்வியல் பாடங்களும் நிறைந்த இந்த ஐந்தாம் நாள் நிகழ்வு, தேனி மாவட்ட மக்களிடையே பெரும் வரவேற்பைப் பெற்றது.