மறுமலர்ச்சி திராவிட முன்னேற்றக் கழகத்தின் துணைப் பொதுச் செயலாளராகப் பணியாற்றி, அக்கட்சியிலிருந்து நீக்கப்பட்ட மல்லை சத்யா, தற்போது ‘திராவிட வெற்றிக் கழகம்’ (DVK) என்ற புதிய இயக்கத்தைத் தொடங்கி அரசியல் களத்தில் அதிரடி மாற்றங்களை ஏற்படுத்தி வருகிறார். திருப்பூர் மாவட்டம் பெருமாநல்லூர் பகுதியில் நடைபெற்ற தனது கட்சியின் மேற்கு மண்டல நிர்வாகிகள் ஆலோசனைக் கூட்டத்தில் பங்கேற்ற அவர், செய்தியாளர்களிடம் பேசுகையில் மதிமுக குறித்தும், தற்போதைய அரசியல் சூழல் குறித்தும் மிகவும் காட்டமான கருத்துக்களைப் பதிவு செய்தார். “மறுமலர்ச்சி திமுக என்பது எங்களுடனே நிறைவடைந்து விட்டது; தற்போது இருப்பது வெறும் ‘மகன் திமுக’ தான்” என்று வைகோவின் தலைமையிலான தற்போதைய மதிமுகவை அவர் கடுமையாகச் சாடினார். வைகோவின் மகனை முன்னிலைப்படுத்தும் அரசியலில் பல தடைகள் இருந்ததாலேயே, கொள்கைகளைக் காக்கத் தங்களைப் போன்றவர்கள் புதிய இயக்கத்தை உருவாக்க நேரிட்டதாக அவர் விளக்கம் அளித்தார்.
உலகத் தமிழர்கள் தைப்பூசத் திருநாளைக் கொண்டாடி வரும் இந்த நன்னாளில், திராவிட வெற்றிக் கழகத்தின் வளர்ச்சி குறித்துப் பேசிய அவர், நீதிக்கட்சி உதயமான நவம்பர் 20-ம் தேதியன்று திருப்பூர் துரைசாமி அவர்களாலேயே தங்கள் இயக்கத்திற்குப் பெயர் சூட்டப்பட்டுத் தொடங்கப்பட்டதை நினைவுகூர்ந்தார். தங்கள் கட்சிக்கும் நடிகர் விஜய்யின் தமிழக வெற்றி கழகத்திற்கும் (TVK) உள்ள வேறுபாட்டை விளக்கிய அவர், “அவர்கள் TVK, நாங்கள் DVK” என்று தெளிவுபடுத்தினார். திமுக ஒரு வலுவான அமைப்பு என்று குறிப்பிட்ட மல்லை சத்யா, வரும் தேர்தலில் கூட்டணி குறித்த பேச்சுவார்த்தைகள் தொடங்கும் போது தங்களுக்கு அழைப்பு விடுக்கப்பட்டால், உதயசூரியன் சின்னத்திலோ அல்லது தனித்தோ போட்டியிட விரும்புவதாகவும், இது குறித்த இறுதி முடிவுகள் வரும் 28-ம் தேதி நடைபெறும் பொதுக்குழுவில் எடுக்கப்படும் என்றும் தெரிவித்தார். மேலும், மதிமுக தற்போது திமுக கூட்டணியில் இருந்தாலும், அக்கட்சியின் கடந்த கால நம்பகத்தன்மையற்ற வரலாற்றைப் பார்க்கும்போது, அவர்கள் அக்கூட்டணியில் நீடிப்பார்களா என்பது கேள்விக்குறியே என்று சந்தேகம் எழுப்பினார்.
மத்திய பட்ஜெட் என்பது தேர்தல் கால கண்துடைப்பு போலவே அமைந்துள்ளதாகக் குறிப்பிட்ட அவர், அவை நடைமுறைப்படுத்தப்பட்டால் மட்டுமே ஏற்க முடியும் என்றார். நடிகர் விஜய்யின் அரசியல் வருகை குறித்துப் பேசுகையில், அவர் பின்னே இருக்கும் லட்சக்கணக்கான இளைஞர்கள் தற்போது ரசிகர்கள் மட்டுமே என்றும், அவர்களைச் சரியான அரசியல் சக்தியாக மாற்ற வேண்டிய பொறுப்பு அவருக்கு உண்டு என்றும் கூறினார். மேலும், விஜய்யின் ‘ஜனநாயகன்’ திரைப்பட வெளியீட்டைத் தணிக்கைக் குழுவை வைத்துக் காலதாமதம் செய்வது தவறானது என்றும், அதனை உடனடியாக வெளியிட நடவடிக்கை எடுக்க வேண்டும் என்றும் அவர் வலியுறுத்தினார். “திராவிடம் என்பது மறுக்க முடியாத அரசியல் அடையாளம்” என்று குறிப்பிட்ட மல்லை சத்யா, ஆட்சியில் பங்கு, அதிகாரத்தில் பங்கு என்பதெல்லாம் தற்போதைய டிரெண்ட் (Trend) ஆகிவிட்டதாகவும், ஒவ்வொரு கட்சியின் வாக்கு சதவீதமே அதனைத் தீர்மானிக்கும் என்றும் கூறினார். திருப்பூர் துரைசாமி தங்களுக்கு முழு ஆதரவை வழங்கி வருவதாகவும், வரும் தேர்தலில் களத்தை இழக்க விரும்பாமல் தங்களது உறுதியான நிலைப்பாட்டை விரைவில் அறிவிக்க உள்ளதாகவும் அவர் தனது பேட்டியில் திட்டவட்டமாகத் தெரிவித்தார்.
