தேனி மாவட்டத்தில் கடந்த சில மாதங்களாக நிலவி வரும் சீரற்ற காலநிலை மாற்றத்தினால், புதிய வகை ‘மெட்ராஸ் ஐ’ (Madras Eye) கண் நோய் பாதிப்பு அதிவேகமாகப் பரவி வருகிறது. பொதுவாக ஒரு வாரத்தில் குணமாகக்கூடிய இந்த நோய், தற்போது உருமாறிய வீரியத்துடன் 20 நாட்களுக்கும் மேலாக நீடிப்பது பொதுமக்களிடையே பெரும் கவலையை ஏற்படுத்தியுள்ளது. மாவட்டத்தில் நிலவும் திடீர் மழை, வெயில் மற்றும் தற்போதைய கடும் பனிப்பொழிவு போன்ற தட்பவெப்ப மாற்றங்களால் சளி, இருமல் பாதிப்பு ஏற்கனவே அதிகரித்துள்ள நிலையில், இந்த கண் நோயும் இணைந்து கொண்டு மக்களை வதைத்து வருகிறது. குறிப்பாக, பள்ளிகளுக்குச் செல்லும் மாணவர்கள் மூலம் இந்தத் தொற்று எளிதாகப் பெற்றோர்களுக்கும் பரவுவதால், குடும்பத்தில் உள்ள அனைத்து உறுப்பினர்களும் அடுத்தடுத்துப் பாதிப்புக்குள்ளாகும் நிலை தொடர்கிறது.
இது குறித்து கண் மருத்துவ நிபுணர்கள் அதிர்ச்சியூட்டும் தகவல்களைப் பகிர்ந்துள்ளனர். வழக்கமாக ‘அடினோ வைரஸ்’ (Adenovirus) தாக்கத்தால் ஏற்படும் இந்த கண் வலி, தற்போது அதன் புதிய வகை உருமாற்றத்துடன் பரவுகிறது. இதில் குறிப்பிடத்தக்க அம்சம் என்னவென்றால், பாதிக்கப்பட்டவர்களுக்கு வைரஸ் பாதிப்புடன் சேர்ந்து ‘பாக்டீரியல்’ (Bacterial infection) தொற்றும் காணப்படுகிறது. இதன் காரணமாகக் கண்கள் அதிகப்படியாகச் சிவந்து வீங்குவதோடு, காதுக்கு அருகில் உள்ள ‘நிணநீர் சுரப்பிகளில்’ (Lymph Nodes) கடுமையான வலி உண்டாகிறது. இந்தத் தீவிர அறிகுறிகள் தென்படுபவர்கள் சுய மருத்துவம் செய்வதைத் தவிர்க்க வேண்டும் என மருத்துவர்கள் எச்சரிக்கின்றனர். மருந்துக் கடைகளில் தாங்களாகவே கண் சொட்டு மருந்துகளை வாங்கிப் பயன்படுத்துவது, பாதிப்பை இன்னும் தீவிரமாக்கி குணமடைவதற்கான கால அவகாசத்தை அதிகப்படுத்துகிறது.
தற்போது தேனி அரசு மருத்துவக் கல்லூரி மருத்துவமனை, அரசு தலைமை மருத்துவமனைகள் மற்றும் ஆரம்பச் சுகாதார நிலையங்களில் கண் சிகிச்சைக்காக வருவோரின் எண்ணிக்கை முன்னெப்போதும் இல்லாத வகையில் உயர்ந்துள்ளது. நோய் எதிர்ப்புச் சக்திக் குறைவாக உள்ளவர்களை இந்நோய் நீண்ட நாட்கள் பாடாய்ப்படுத்துகிறது. இந்தத் தொற்று மேலும் பரவாமல் தடுக்க, பாதிக்கப்பட்டவர்கள் பயன்படுத்திய துண்டு, தலையணை மற்றும் கைக்குட்டைகளைப் பிறர் பயன்படுத்தக் கூடாது என்றும், அடிக்கடி சோப்பு போட்டு கைகளைக் கழுவுவதே மிகச்சிறந்த பாதுகாப்பு முறை என்றும் சுகாதாரத் துறை அறிவுறுத்தியுள்ளது. தேனி மாவட்டத்தின் கிராமப்புறங்களில் இது குறித்த விழிப்புணர்வை ஏற்படுத்தச் சுகாதாரப் பணியாளர்கள் முடுக்கி விடப்பட்டுள்ளனர்.
