திண்டுக்கல் மாவட்ட முதன்மை கல்வி அலுவலக வளாகத்தில், பல லட்சம் ரூபாய் மதிப்பில் மாணவர்களின் கல்வி வளர்ச்சிக்காக வழங்கப்பட்ட நடமாடும் அறிவியல் ஆய்வக வாகனம், கடந்த ஏழு ஆண்டுகளாக எவ்வித பயன்பாடும் இன்றி நூலாம்படை படர்ந்து பாழடைந்து வருவது சமூக ஆர்வலர்களிடையே பெரும் அதிருப்தியை ஏற்படுத்தியுள்ளது. கடந்த 2009-ஆம் ஆண்டு தொடக்கக் கல்வி இயக்குனரகம் சார்பில், கிராமப்புற மாணவர்களுக்கு நவீன தொழில்நுட்பக் கல்வியை கொண்டு சேர்க்கும் உன்னத நோக்கில் தமிழகம் முழுவதும் 15 சிறப்பு வாகனங்கள் வழங்கப்பட்டன. அதில் ஒரு வாகனத்தைப் பெற்ற திண்டுக்கல் மாவட்டம், தொடக்கத்தில் அதனைச் சிறப்பாகப் பயன்படுத்திய போதிலும், கடந்த ஏழு ஆண்டுகளாக அந்த வாகனம் அலுவலகத்தின் ஒரு மூலையில் கேட்பாரற்ற நிலையில் நிறுத்தி வைக்கப்பட்டுள்ளது.
இந்த நவீன வாகனத்தில் தொலைக்காட்சிப் பெட்டி, புரோஜெக்டர், உயர்தர ஒலிபெருக்கிகள் மற்றும் அறிவியலை எளிமையாகப் புரிந்துகொள்ள உதவும் செய்முறை மாதிரி உபகரணங்கள் என ஒரு நடமாடும் வகுப்பறைக்கே உண்டான அனைத்து வசதிகளும் உள்ளன. குறிப்பாக, குக்கிராமங்களில் உள்ள அரசுப் பள்ளி மாணவர்கள் அறிவியல் சோதனைகளை நேரடியாகச் செய்து பார்க்கவும், கல்வி சார்ந்த காணொளிகளைக் கண்டு களிக்கவும் இந்த வாகனம் பேருதவியாக இருக்கும். ஆனால், பராமரிப்பு இன்மையால் தற்போது இந்த வாகனத்தின் இயந்திரம் பழுதடைந்து, டயர்கள் காற்று இறங்கி, துருப்பிடிக்கும் நிலைக்குத் தள்ளப்பட்டுள்ளது. இது பொதுமக்களின் வரிப்பணம் வீணடிக்கப்படுவதையே காட்டுகிறது.
இந்த அலுவலக வளாகத்திற்கு தினந்தோறும் வந்து செல்லும் மாவட்ட முதன்மை கல்வி அலுவலர், மாவட்ட கல்வி அலுவலர் மற்றும் தொடக்கக் கல்வி அலுவலர் என உயர்மட்ட அதிகாரிகள் பலரும் இந்த அவலநிலையைக் கண்டும் காணாமல் இருப்பது வேதனைக்குரியது. அரசுப் பள்ளிகளில் மாணவர் சேர்க்கையை அதிகரிக்கவும், தரமான கல்வியை வழங்கவும் பல்வேறு திட்டங்கள் செயல்படுத்தப்பட்டு வரும் நிலையில், கையில் இருக்கும் ஒரு நவீன வாகனத்தை முறையாகப் பயன்படுத்தாமல் இருப்பது பெரும் பின்னடைவாகக் கருதப்படுகிறது. எனவே, மாவட்ட ஆட்சியர் சரவணன் மற்றும் முதன்மை கல்வி அலுவலர் உஷா ஆகியோர் உடனடியாகத் தலையிட்டு, இந்த வாகனத்தை பழுதுபார்த்து, மீண்டும் கிராமப்புற மாணவர்களின் பயன்பாட்டிற்கு கொண்டு வர உரிய நடவடிக்கை எடுக்க வேண்டும் என்பதே கல்வி ஆர்வலர்களின் கோரிக்கையாக உள்ளது.
