மதுரை மாநகரின் பொற்கால ஆட்சியைத் தந்த மாமன்னர் திருமலை நாயக்கரின் பிறந்த தினமான இன்று, திண்டுக்கல் மாவட்டம் நத்தத்தில் லிங்கமநாயக்கர் பேரவை சார்பில் அவரது ஜெயந்தி விழா மிகச் சிறப்பாகக் கொண்டாடப்பட்டது. நாயக்கர் மன்னர்களின் வரலாற்றுச் சிறப்பையும், அவர்கள் தமிழகக் கலை மற்றும் கலாச்சாரத்திற்கு ஆற்றியப் பங்களிப்பையும் போற்றும் விதமாக இந்த விழா முன்னெடுக்கப்பட்டது. நத்தத்தில் நடைபெற்ற இந்த விழாவிற்கு லிங்கமநாயக்கர் பேரவையின் ஒன்றிய செயலாளர் பிரபு அவர்கள் தலைமை தாங்கினார். மேற்கு மாவட்ட ஒருங்கிணைப்பாளர் கணபதி, ஒன்றிய தலைவர் மணிகண்டன் மற்றும் ஒன்றிய பொருளாளர் தினேஷ்வரன் ஆகியோர் முன்னிலை வகித்து விழாவினைச் சிறப்பித்தனர்.
நத்தம் அவுட்டர் பகுதியில் மாமன்னர் திருமலை நாயக்கரின் திருவுருவப் படம் மலர்களால் அலங்கரித்து வைக்கப்பட்டிருந்தது. விழாவின் முக்கிய நிகழ்வாக, அவரது படத்திற்கு மாலை அணிவித்து, மலர்தூவி மாரியாதை செய்யப்பட்டது. அதனைத் தொடர்ந்து பல்வேறு அரசியல் கட்சிகளின் பிரமுகர்களும், சமூக அமைப்புகளின் தலைவர்களும் திரளாகக் கலந்துகொண்டு மன்னரின் உருவப்படத்திற்குத் தங்களது மரியாதையைச் செலுத்தினர். நாயக்கர் மன்னர்களின் ஆட்சி காலத்தில் கட்டப்பட்ட கோயில்கள் மற்றும் கட்டடக்கலைகளின் சிறப்புகளை இந்த விழாவில் பங்கேற்ற நிர்வாகிகள் நினைவு கூர்ந்தனர்.
இந்த எழுச்சியான விழாவில் லிங்கமநாயக்கர் பேரவையின் ஒன்றிய துணை செயலாளர் பிரகாஷ், இளைஞரணி தலைவர் முத்துப்பாண்டி, செயலாளர் அருண் உள்ளிட்ட பேரவையின் முக்கிய நிர்வாகிகள் மற்றும் ஏராளமான தொண்டர்கள் கலந்து கொண்டனர். திரளான பொதுமக்கள் இந்த நிகழ்வில் பங்கேற்று மன்னரின் புகழைப் போற்றினர். விழாவையொட்டி அப்பகுதியில் இனிப்புகள் வழங்கப்பட்டதோடு, மாமன்னர் திருமலை நாயக்கரின் சாதனைகளை விளக்கும் உரைகளும் நிகழ்த்தப்பட்டன. நத்தம் பகுதியில் நடைபெற்ற இந்த ஜெயந்தி விழா அப்பகுதி மக்களிடையே பெரும் வரவேற்பைப் பெற்றது.
