கும்பகோணம் நகரின் மையப்பகுதியில் அமைந்துள்ள தற்போதைய பேருந்து நிலையத்தை, சுமார் 7 கிலோமீட்டர் தொலைவில் உள்ள கருப்பூர் பகுதிக்கு மாற்ற முற்படும் தி.மு.க. அரசின் முடிவைக் கண்டித்து அ.தி.மு.க. சார்பில் நேற்று பிரம்மாண்ட கண்டன ஆர்ப்பாட்டம் நடைபெற்றது. கும்பகோணம் காந்தி பூங்கா அருகே நடைபெற்ற இந்த ஆர்ப்பாட்டத்திற்குத் தலைமை தாங்கிப் பேசிய முன்னாள் அமைச்சர் ஆர். காமராஜ், அரசின் இந்த நடவடிக்கைக்குப் பின்னால் பெரும் நில முறைகேடு ஒளிந்திருப்பதாகப் பகிரங்கமாகக் குற்றம் சாட்டினார். கும்பகோணம் மாநகரின் இதயம் போன்ற பகுதியில் அமைந்துள்ள தற்போதைய பேருந்து நிலையத்தில் 1,000 பேருந்துகள் வந்து செல்வதற்கான இடவசதி இருந்தும், அங்கு வெறும் 400 பேருந்துகள் மட்டுமே இயக்கப்படுவதாகச் சுட்டிக்காட்டிய அவர், போதுமான இடவசதி இருக்கும்போது பேருந்து நிலையத்தை ஊருக்கு வெளியே மாற்ற வேண்டிய அவசியம் என்ன? எனக் கேள்வி எழுப்பினார்.
இந்த இடமாற்றத்தின் பின்னணியில் ஆளுங்கட்சியினரின் ரியல் எஸ்டேட் தந்திரம் மட்டுமே இருப்பதாகச் சாடிய காமராஜ், கருப்பூர் மற்றும் அதனைச் சுற்றியுள்ள பகுதிகளில் ஆளுங்கட்சிப் பிரமுகர்களுக்குச் சொந்தமாக நூற்றுக்கணக்கான ஏக்கர் நிலங்கள் இருப்பதே இதற்குக் காரணம் என்று தெரிவித்தார். கும்பகோணம் தொகுதி தி.மு.க. எம்.எல்.ஏ. அன்பழகன் 10.58 ஏக்கர் நிலத்தையும், கோவையைச் சேர்ந்த ரியல் எஸ்டேட் அதிபர் ஒருவர் 2.24 ஏக்கர் நிலத்தையும் பேருந்து நிலையத்திற்காகத் தானமாக வழங்கியிருப்பதாகக் கூறப்படுவது பெரும் சந்தேகத்தை ஏற்படுத்துவதாக அவர் குறிப்பிட்டார். “ரியல் எஸ்டேட் தொழிலை வளர்ப்பதற்காகவே விளைநிலங்களை அழித்து இந்தப் புதிய பேருந்து நிலையத் திட்டம் கொண்டு வரப்படுகிறது. விவசாய மண்டலமாக அறிவிக்கப்பட்ட டெல்டா பகுதியில் விவசாய நிலங்களை இவ்வாறு கையகப்படுத்துவது விவசாயிகளுக்கு இழைக்கப்படும் துரோகம்” என்று அவர் ஆவேசமாகப் பேசினார்.
மேலும், கடந்த 2024 டிசம்பர் 30-ஆம் தேதி நடைபெற்ற மாநகராட்சிக் கூட்டத்தில், பேருந்து நிலையம் மாற்றம் தொடர்பான தீர்மானம் கொண்டு வரப்பட்டபோது மேயர் மயங்கி விழுந்ததால் கூட்டம் ஒத்திவைக்கப்பட்டதாகக் குறிப்பிட்ட அவர், அவ்வாறு ஒத்திவைக்கப்பட்ட கூட்டத்தில் எப்படித் தீர்மானம் நிறைவேற்றப்பட்டது என்பது மர்மமாக உள்ளது என்றார். அதிகாரிகளின் துணையோடு முறைகேடாக இந்தத் தீர்மானம் நிறைவேற்றப்பட்டுள்ளதாகக் குற்றம் சாட்டிய அவர், அதிகாரிகள் இத்தகைய அநீதிகளுக்குத் துணை போகக் கூடாது என எச்சரித்தார். நகரின் மையப்பகுதியில் இருந்து பேருந்து நிலையம் மாற்றப்பட்டால் பள்ளி மாணவர்கள், வியாபாரிகள் மற்றும் பொதுமக்கள் கடும் பாதிப்புக்கு உள்ளாவார்கள் என்றும், இந்தத் திட்டத்தைக் கைவிடும் வரை அ.தி.மு.க.வின் போராட்டம் ஓயாது என்றும் அவர் உறுதிபடத் தெரிவித்தார்.