கரூர் மாவட்டம் வேலாயுதம்பாளையம் ரவுண்டானா பகுதியில், பாரதிய மஸ்தூர் சங்கம் (BMS) சார்பில் மத்திய அரசின் புதிய நான்கு தொழிலாளர் சட்டத் தொகுப்புகள் (Labour Codes) குறித்த முக்கிய விழிப்புணர்வு மற்றும் விளக்கக் கூட்டம் நடைபெற்றது. தொழிலாளர்களின் உரிமைகள் மற்றும் நவீன காலத்திற்கு ஏற்ப சட்டங்களில் செய்யப்பட்டுள்ள மாற்றங்கள் குறித்து விவாதிக்கப்பட்ட இந்நிகழ்விற்கு மாவட்டத் தலைவர் சிவக்குமார் தலைமை தாங்கினார்.
கூட்டத்தில் சிறப்பு அழைப்பாளராகப் பங்கேற்றுப் பேசிய மாநிலப் பொதுச்செயலாளர் சங்கர், மத்திய அரசு கொண்டு வந்துள்ள நான்கு தொழிலாளர் சட்டத் தொகுப்புகள், குறிப்பாக அமைப்புசாரா தொழிலாளர்களின் வாழ்வாதாரத்தை மேம்படுத்தும் வகையில் வடிவமைக்கப்பட்டுள்ளதாகக் குறிப்பிட்டார். புதிய சட்டங்களின்படி, தொழிலாளர்களுக்கு முறையான பணி நியமன ஆணை (Appointment Order) வழங்குவது இனி கட்டாயமாக்கப்பட்டுள்ளது. இது தொழிலாளர்களின் பணி பாதுகாப்பை உறுதி செய்வதோடு, முறையற்ற பணிநீக்கங்களில் இருந்து அவர்களைப் பாதுகாக்கும் ஒரு கேடயமாக அமையும்.
பெண்களுக்கான உரிமைகள் குறித்து அவர் பேசுகையில், “புதிய சட்டங்களின் கீழ் பெண்கள் 24 மணி நேரமும் தங்களுக்கு விருப்பமான ஷிப்டுகளில் பணிபுரிய அனுமதி வழங்கப்பட்டுள்ளது. மிக முக்கியமாக, ஆண்களுக்கு இணையாகப் பெண்கள் ஒரே மாதிரியான பணிகளைச் செய்யும் போது, அவர்களுக்குச் சமமான ஊதியம் (Equal Wages) வழங்கப்பட வேண்டும் என்பது சட்டமாக்கப்பட்டுள்ளது. இது பாலினப் பாகுபாட்டைத் தகர்க்கும் ஒரு புரட்சிகரமான மாற்றமாகும்” என்றார்.
தொழிலாளர் பாதுகாப்பு குறித்து விளக்குகையில், ஒரு தொழிலாளி தனது வீட்டிலிருந்து வேலைக்குப் புறப்படுவதில் தொடங்கி, வேலை முடிந்து மீண்டும் வீடு திரும்பும் வரை இடைப்பட்ட காலத்தில் எப்போது விபத்து ஏற்பட்டாலும், அது பணி சார்ந்த விபத்தாகக் கருதப்பட்டு உரிய இழப்பீடு பெற வழிவகை செய்யப்பட்டுள்ளது. மேலும், 40 வயதைக் கடந்த தொழிலாளர்களுக்கு ஆண்டுக்கு ஒருமுறை கட்டாய மருத்துவப் பரிசோதனையை நிறுவனங்களே செய்ய வேண்டும் என்ற அம்சம் அவர்களின் ஆரோக்கியத்தைப் பேண உதவும்.
தொடர்ந்து பேசிய அவர், தொழில்துறை உறவுகள் சட்டம் மற்றும் தொழில் பாதுகாப்பு, சுகாதாரம், பணி நிலைமை ஆகிய சட்டங்களில் மேலும் 12 முக்கியத் திருத்தங்களைக் கொண்டு வருமாறு பாரதிய மஸ்தூர் சங்கம் சார்பில் மத்திய அரசுக்குப் பரிந்துரைகள் வழங்கப்பட்டுள்ளதாகத் தெரிவித்தார். இக்கூட்டத்தில் மாவட்டத் துணைத் தலைவர் நந்தகோபால், மாவட்டச் செயலாளர் கருப்பையா, ஒன்றியப் பொறுப்பாளர் பன்னீர்செல்வம் மற்றும் திரளான தொழிலாளர்கள் கலந்துகொண்டு தங்களது சந்தேகங்களைத் தெளிவுபடுத்திக் கொண்டனர்.