கோவை மாவட்டம் மேட்டுப்பாளையம் நகராட்சி அனைத்து இந்து சமுதாய சங்க நந்தவனத்தில், தை மாத அமாவாசையை முன்னிட்டுத் தங்களது முன்னோர்களுக்குத் திதி மற்றும் தர்ப்பணம் கொடுக்கும் நிகழ்வு இன்று மிக விமரிசையாக நடைபெற்றது. வருடத்தில் வரும் மற்ற அமாவாசைகளை விடத் தை அமாவாசை மற்றும் ஆடி அமாவாசை தினங்களில் முன்னோர்களுக்குச் செய்யப்படும் வழிபாடு அவர்களுக்கு மிகுந்த ஆன்ம திருப்தியை அளிக்கும் என்பது ஐதீகம். அந்த வகையில், தங்களின் முன்னோர்களின் ஆசீர்வாதம் கிடைக்கவும், மறைந்த ஆத்மாக்கள் சாந்தி அடையவும் வேண்டி, பல்லாயிரக்கணக்கான பொதுமக்கள் அதிகாலை முதலே மேட்டுப்பாளையம் பவானி ஆற்றின் கரையில் குவியத் தொடங்கினர். பவானி ஆற்றில் புனித நீராடிய பின்னர், ஆற்றங்கரையில் அமைந்துள்ள நந்தவனத்தில் தங்கள் முன்னோர்களுக்குப் பிடித்தமான காய்கறிகள், பழங்கள் மற்றும் உணவுகளைப் படைத்துத் தர்ப்பணம் கொடுத்து வழிபட்டனர்.
பொதுமக்கள் எந்தவிதத் தடையுமின்றி வழிபாடு செய்வதை உறுதி செய்யும் வகையில், நந்தவனம் சார்பில் 30-க்கும் மேற்பட்ட வேத விற்பன்னர்கள் மற்றும் புரோகிதர்கள் அமர்த்தப்பட்டு முறைப்படி பூஜைகள் செய்யப்பட்டன. புரோகிதர்கள் ஓதிய மந்திரங்களுக்கு இடையே, பொதுமக்கள் பிண்டங்களை உருட்டிப் பூஜைகளைச் செய்து, பின்னர் அவற்றை முறையாகப் பவானி ஆற்றில் கரைத்து வணங்கினர். இந்த நிகழ்விற்குக் கோவை மட்டுமன்றி அண்டை மாவட்டங்களான ஈரோடு, நீலகிரி மற்றும் திருப்பூர் ஆகிய இடங்களிலிருந்தும் ஏராளமான பொதுமக்கள் குடும்பம் குடும்பமாக வருகை தந்திருந்தனர். பக்தர்களின் வசதிக்காக நந்தவன நிர்வாகத்தின் சார்பில் அனைவருக்கும் இலவசமாகத் தேநீர், காபி, பிஸ்கட் மற்றும் மதிய உணவாகத் தயிர் சாதம் ஆகியவை வழங்கப்பட்டுச் சிறப்பான முறையில் உபசரிக்கப்பட்டது.
இந்த ஏற்பாடுகளை அனைத்து இந்து சமுதாய சங்க நந்தவனத் தலைவர் என்.எஸ்.வி.ஆறுமுகம் தலைமையில், செயலாளர் சுகுமார், பொருளாளர் அருணாச்சல குமார் ஆகியோர் முன்னின்று ஒருங்கிணைத்தனர். மேலும், துணைத்தலைவர் காளியப்ப கவுண்டர், துணைச் செயலாளர்கள் உதயகுமார், அனுமந்த ராவ், இணைச் செயலாளர் பத்திரன் மற்றும் அனைத்து சமுதாய சங்கங்களின் பிரதிநிதிகள், செயற்குழு உறுப்பினர்கள் எனப் பலரும் தன்னார்வத்துடன் பணிகளை மேற்கொண்டனர். கூட்ட நெரிசலைக் கட்டுப்படுத்தவும், வாகன நிறுத்தம் மற்றும் அடிப்படை வசதிகளைச் செய்யவும் நந்தவனப் பணியாளர்கள் சிறப்பான ஏற்பாடுகளைச் செய்திருந்தனர். முன்னோர்களுக்குச் செய்யப்படும் இந்தத் தர்ப்பண நிகழ்வு, குடும்ப ஒற்றுமைக்கும், சந்ததியினரின் நல்வாழ்விற்கும் வழிவகுக்கும் என்ற நம்பிக்கையுடன் திரளான பொதுமக்கள் தங்களின் கடமைகளை நிறைவேற்றிச் சென்றனர்.