அமெரிக்காவின் டெக்ஸாஸ் மாகாணத்தில் நிகழ்ந்த கொடூரமான துப்பாக்கிச் சூடு தாக்குதலில், இந்திய வம்சாவளியைச் சேர்ந்த இளம் மாணவி உட்பட நான்கு பேர் உயிரிழந்த சம்பவம் உலகெங்கும் உள்ள இந்தியர்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது. கடந்த ஞாயிற்றுக்கிழமை (மார்ச் 1) அதிகாலை வேளையில், டெக்ஸாஸ் மாகாணத்தின் மக்கள் நடமாட்டம் மிகுந்த வெஸ்ட் சிக்ஸ்த் ஸ்டீரிட் பகுதியில் இந்தத் தாக்குதல் அரங்கேறியுள்ளது. மர்ம நபர் ஒருவர் திடீரென மக்கள் கூட்டத்தை நோக்கித் தானியங்கி துப்பாக்கியால் சரமாரியாகச் சுடத் தொடங்கியதில், சம்பவ இடத்திலேயே நான்கு பேர் ரத்த வெள்ளத்தில் துடிதுடித்து உயிரிழந்தனர். இச்சம்பவம் ஒரு திட்டமிடப்பட்ட பயங்கரவாதத் தாக்குதலாக இருக்கலாம் என அமெரிக்கப் புலனாய்வு அமைப்புகள் முதற்கட்ட விசாரணையில் சந்தேகம் வெளியிட்டுள்ளன.
இந்தத் தாக்குதலில் உயிரிழந்தவர்களில் ஒருவரான சவிதா சன்முகசுந்தரம் (21), டெக்ஸாஸ் பல்கலைக்கழகத்தில் முதுகலைப் பட்டம் படித்து வந்த மிகச் சிறந்த மாணவி என்பது தெரியவந்துள்ளது. ஆஸ்டின் பகுதியைச் சேர்ந்த இந்திய வம்சாவளியைச் சேர்ந்த இவர், தனது எதிர்காலக் கனவுகளுடன் கல்வி பயின்று வந்த நிலையில், இந்த வன்முறைக்கு இரையாகியுள்ளார். இவருடன் ரைடர் ஹாரிங்டன் (19) என்பவரும் கொல்லப்பட்டதை அதிகாரிகள் உறுதி செய்துள்ளனர். பலியான மற்ற இருவரின் அடையாளங்களைச் சேகரிக்கும் பணியில் அமெரிக்கக் காவல் துறையினர் ஈடுபட்டு வருகின்றனர். அமெரிக்காவில் இந்திய மாணவர்கள் மீதான தாக்குதல்கள் சமீபகாலமாக அதிகரித்து வரும் சூழலில், இந்தத் துப்பாக்கிச் சூடு சம்பவம் அங்கு வாழும் இந்திய சமூகத்தினரிடையே பாதுகாப்பு குறித்த பெரும் அச்சத்தை விதைத்துள்ளது.
சம்பவம் நடந்த இடத்தில் இருந்தும், தாக்குதல் நடத்திய கொலையாளியின் வீட்டில் இருந்தும் ஈரானிய தேசியக் கொடி மற்றும் சில தீவிரவாதக் கருத்துக்கள் அடங்கிய கடிதங்களை அமெரிக்கப் பாதுகாப்புப் படையினர் கைப்பற்றியுள்ளனர். ஈரான் மீது அமெரிக்கா மற்றும் இஸ்ரேல் மேற்கொண்டு வரும் ராணுவத் தாக்குதல்களுக்குப் பழிவாங்கும் நோக்கில் இந்தத் தாக்குதல் நடத்தப்பட்டிருக்கலாம் எனப் புலனாய்வு அதிகாரிகள் கருதுகின்றனர். சர்வதேச அரசியல் மோதல்களின் எதிரொலியாக அப்பாவிப் பொதுமக்கள் மற்றும் மாணவர்கள் குறிவைக்கப்படுவது கடும் கண்டனத்திற்கு உள்ளாகி வருகிறது. அமெரிக்க அதிபர் மாளிகை இந்தச் சம்பவத்திற்கு ஆழ்ந்த இரங்கல் தெரிவித்துள்ளதோடு, இது குறித்த உயர்மட்ட விசாரணைக்கு உத்தரவிட்டுள்ளது. உயிரிழந்த மாணவி சவிதா சன்முகசுந்தரத்தின் உடலை இந்தியா கொண்டு வரவும், பாதிக்கப்பட்ட குடும்பத்தினருக்குத் தேவையான உதவிகளைச் செய்யவும் இந்தியத் தூதரகம் அமெரிக்க அதிகாரிகளுடன் இணைந்து செயல்பட்டு வருகிறது.