வரவிருக்கும் சட்டசபைத் தேர்தலை முன்னிட்டு, திமுக தலைவர் மற்றும் முதல்வர் மு.க. ஸ்டாலின் கட்சியின் நிலைப்பாட்டை வலுப்படுத்தும் நோக்கில், “உடன்பிறப்பே வா” என்ற தலைப்பில் நிர்வாகிகளுடன் தீவிர ஆலோசனைகள் நடத்தி வருகிறார். இதன் ஒரு பகுதியாக நெல்லை மற்றும் சங்கரன்கோவில் தொகுதி நிர்வாகிகளுடன் இன்று அண்ணா அறிவாலயத்தில் நடைபெற்ற சந்திப்பில், ஸ்டாலின் கடுமையான எச்சரிக்கையை விடுத்துள்ளார்.
தகவலின்படி, “நெல்லை தொகுதியில் மீண்டும் தோல்வி ஏற்பட்டால், அத்தனை நிர்வாகிகளின் பதவிகளும் பறிக்கப்படும்” என முதல்வர் நேரடியாக எச்சரித்துள்ளார்.
சட்டசபைத் தேர்தலுக்கு இன்னும் ஆறு மாதங்கள் மட்டுமே உள்ள நிலையில், திமுக தலைமையகம் தேர்தல் பணிகளில் முழு வேகத்தைப் பெற்றுள்ளது. கடந்த 33 நாட்களில் 73 தொகுதிகளைச் சேர்ந்த நிர்வாகிகளுடன் ஸ்டாலின் நேரடியாக ஆலோசனை முடித்திருக்கிறார். இதில் தேர்தல் வியூகம், மக்கள் தொடர்பு, அரசு திட்டங்கள் சென்றடைந்த நிலை, மற்றும் உள்ளக மோதல்கள் போன்றவை குறித்து விவாதிக்கப்பட்டுள்ளன.
நெல்லை மாவட்டத்தில் தற்போது கட்சிக்குள் உள்ள குழப்ப நிலை காரணமாக, ஸ்டாலின் அங்குள்ள நிர்வாகிகளிடம் கட்டுப்பாடு மற்றும் ஒற்றுமையை வலியுறுத்தியதாக கூறப்படுகிறது. “உட்கட்சி பூசலை ஒதுக்கி வைத்து, கட்சி வெற்றிக்காக ஒன்றிணைந்து பணியாற்றுங்கள்” என்ற அறிவுறுத்தலையும் அவர் வழங்கியுள்ளார்.
கடந்த தேர்தலில் நெல்லை தொகுதியில் திமுக தோல்வியடைந்தது குறித்து ஸ்டாலின் காரணங்களை நேரடியாக கேட்டதாகவும், அங்கு பாஜக மாநில தலைவர் நயினார் நாகேந்திரன் எம்எல்ஏவாக இருப்பதை நினைவுபடுத்தியதாகவும் தகவல்கள் தெரிவிக்கின்றன.
கன்னியாகுமரி மற்றும் நெல்லை மாவட்டங்களில் காங்கிரஸ் கட்சிக்கு வலுவான ஆதரவு இருப்பதால், அந்த தொகுதிகள் மீண்டும் கூட்டணியில் ஒதுக்கப்படும் வாய்ப்புகள் இருப்பதாக கூறப்படுகிறது. எனினும், எந்த கட்சிக்கும் தொகுதி ஒதுக்கப்பட்டாலும், நயினார் நாகேந்திரனை வீழ்த்த வேண்டும் என்பதில் திமுக கட்சியின் குறி தெளிவாக இருப்பதாகவும் திமுக வட்டாரங்கள் தெரிவித்துள்ளன.