தேனி மாவட்டத்தின் ஐந்து மாவட்ட மக்களின் தாகம் தீர்க்கும் வாழ்வாதாரமாக விளங்கும் முல்லைப் பெரியாறு அணை நீரில், கேரள மாநிலம் குமுளி நகரக் குடியிருப்புகள் மற்றும் உணவகங்களின் கழிவுநீர் நேரடியாகக் கலக்கும் அவலநிலை பல ஆண்டுகளாகத் நீடித்து வருகிறது. அணையிலிருந்து தமிழகப் பகுதிக்குச் சாகுபடி மற்றும் குடிநீருக்காகத் திறக்கப்படும் தண்ணீர், தேக்கடி ஷட்டரிலிருந்து சுமார் ஒன்றரை கிலோமீட்டர் தூரம் வரை ‘திறவை வாய்க்கால்’ வழியாகப் பயணிக்கிறது. இந்தப் பாதையில் குமுளி நகரில் உள்ள நூற்றுக்கணக்கான விடுதிகள் (Lodges), உணவகங்கள் மற்றும் ஆயிரக்கணக்கான குடியிருப்புகளிலிருந்து வெளியேறும் சுத்திகரிப்பு செய்யப்படாத கழிவுநீர், எவ்வித தடையுமின்றி நேரடியாக ஆற்று நீரில் கலக்கிறது. இதனால் தூய்மையான மலைநீர், மாசடைந்த நீராக மாறித் தமிழகப் பகுதிக்குள் நுழைகிறது.
இந்த மாசடைந்த நீரானது கூடலூர், கம்பம், உத்தமபாளையம், சின்னமனூர் உள்ளிட்ட நகராட்சிகளுக்கும், பண்ணைப்புரம், தேவாரம், கோம்பை போன்ற பேரூராட்சி பகுதிகளுக்கும் பம்பிங் செய்யப்பட்டு விநியோகிக்கப்படுகிறது. இதுமட்டுமின்றி, ஆற்றின் கரையோரம் அமைந்துள்ள குள்ளப்பகவுண்டன்பட்டி, சுருளிப்பட்டி, நாராயணத்தேவன்பட்டி உள்ளிட்ட பத்துக்கும் மேற்பட்ட கிராம மக்கள் எவ்வித சுத்திகரிப்பும் இன்றி இந்த நீரை நேரடியாகக் குடிநீராகப் பயன்படுத்தி வருகின்றனர். இதனால் இந்தப் பகுதி மக்களிடையே பல்வேறு தோல் நோய்கள், வயிற்றுப்போக்கு மற்றும் தொற்றுநோய்கள் பரவும் அபாயம் ஏற்பட்டுள்ளது. இது குறித்துக் கடந்த 2017-ஆம் ஆண்டு குமுளியைச் சேர்ந்த சஜிமோன் சலீம் என்பவர் கேரள உயர் நீதிமன்றத்தில் பொதுநல வழக்கு தொடர்ந்துள்ளார் என்பதும் குறிப்பிடத்தக்கது.
இப்பிரச்சினைக்குத் தீர்வாகத் தேனி மாவட்ட ஆட்சியர் முன்னிலையில் தமிழக நீர்வளத் துறையினர் கடந்த காலங்களில் ஆய்வு மேற்கொண்டனர். அப்போது சுமார் ரூ.65 லட்சம் மதிப்பீட்டில் கழிவுநீர் சுத்திகரிப்பு நிலையம் (Sewage Treatment Plant) அமைக்கப்படும் என உறுதி அளிக்கப்பட்டது. அதேபோல, குமுளி ஊராட்சி நிர்வாகமும் இதற்கான திட்டங்களை அறிவித்தது. ஆனால், பல ஆண்டுகள் கடந்தும் அத்திட்டங்கள் அனைத்தும் கானல் நீராகவே உள்ளன. மாநிலங்களுக்கு இடையேயான நதிநீர்ப் பிரச்சினையாக இது பார்க்கப்படுவதால், அதிகாரிகள் மெத்தனம் காட்டுவதாகப் பொதுமக்கள் குற்றம் சாட்டுகின்றனர். முல்லைப் பெரியாறு நீரை நம்பியுள்ள லட்சக்கணக்கான மக்களின் நலனைக் கருத்தில் கொண்டு, கழிவுநீர் கலப்பதைத் தடுக்கத் தமிழக மற்றும் கேரள அரசுகள் இணைந்து போர்க்கால அடிப்படையில் சுத்திகரிப்பு நிலையத்தை அமைக்க வேண்டும் என்பதே தேனி மாவட்ட மக்களின் ஒட்டுமொத்த கோரிக்கையாக உள்ளது.
