பாட்டாளி மக்கள் கட்சியில் நீண்ட நாட்களாக நீடித்து வந்த அப்பா–மகன் மோதல் முடிவுக்கு வந்துள்ளதா என்ற எதிர்பார்ப்பு எழுந்துள்ளது. கட்சி நிறுவனர் ராமதாஸும், தலைவர் அன்புமணியும், வரும் பூம்புகார் மகளிர் மாநாட்டில் இணைந்து பங்கேற்க முடிவு செய்துள்ளதோடு, சமாதான பேச்சுவார்த்தைகள் இறுதி கட்டத்தை எட்டியுள்ளதாக தகவல்கள் தெரிவிக்கின்றன.
ஆறு மாதங்கள் நீண்ட சண்டை
2023 டிசம்பர் 28ம் தேதி புதுச்சேரியில் நடைபெற்ற பா.ம.க. பொதுக்குழுவில், அப்பா–மகன் இடையே வெடித்த கருத்து வேறுபாடு, தொடர்ந்து ஆறு மாதங்களுக்கு மேலாக நீடித்து வருகிறது. கடந்த ஏப்ரல் 10ம் தேதி, அன்புமணியை தலைவர் பதவியில் இருந்து நீக்கிய ராமதாஸ், “நானே தலைவர்” என அறிவித்து, இருவரும் தனித்தனியாக செயல்பட்டு வந்தனர்.
சமாதான முயற்சிகள் பலவீனமாகத் தொடங்கின
இருவருக்கும் இடையே சமாதானத்தை ஏற்படுத்த ஆடிட்டர் ஒருவர் மற்றும் முன்னாள் எம்.எல்.ஏ. ஒருவர் மேற்கொண்ட முயற்சிகள் தொடக்கத்தில் தோல்வியடைந்தன. இருப்பினும், சமாதானம் முயற்சிகள் இடைமறியாமல் தொடர்ந்து நடைபெற்றன.
வலுப்பெறும் அரசியல் அழுத்தம்
ராமதாஸ் – அன்புமணி தரப்பில் பா.ஜ.க. மற்றும் அ.தி.மு.க.வின் முக்கிய தலைவர்களும் தொடர்ந்து பேசிக் கொண்டிருந்ததாக கூறப்படுகிறது. “வன்னியர் ஆதரவு முழுமையாக பா.ம.க.வுக்கே உள்ளது. அதனை தி.மு.க. வசம் செல்லவிடக் கூடாது” எனும் கருத்துடன், இக்கட்சி தலைவர்கள் இருவரையும் சமாதானப்படுத்தும் பணியில் ஈடுபட்டுள்ளனர்.
குடும்பத்தினரின் பங்கு
இந்த முயற்சிகளில் ராமதாஸின் மகள்கள் மற்றும் அன்புமணியின் மனைவி சௌமியா ஆகியோரும் முக்கிய பங்காற்றியதாகவும், பா.ஜ.க. தரப்பினர் இவர்களிடம் நேரடியாக பேசியதாகவும் தகவல்கள் தெரிவிக்கின்றன.
மாநாட்டில் இணையும் ராமதாஸ் – அன்புமணி
இதன் தொடர்ச்சியாக, ஆகஸ்ட் 10ம் தேதி பூம்புகாரில் நடைபெற உள்ள மகளிர் மாநாட்டில், ராமதாஸ் மற்றும் அன்புமணி இருவரும் இணைந்து பங்கேற்க ஏற்பாடுகள் நடைபெறுகின்றன. அன்புமணியின் பெயர் மற்றும் புகைப்படத்துடன் கூடிய அழைப்பிதழ் தயாராகி வருவதாக கட்சி வட்டாரங்கள் உறுதிப்படுத்துகின்றன.
ஒட்டுக்கேட்பு விவகாரம் – புதிய சூழ்நிலை ?
இந்நிலையில், தைலாபுரத்தில் உள்ள தனது இல்லத்தில் ஒட்டுக்கேட்பு கருவி இருந்ததாக ராமதாஸ் காவல்துறையில் புகார் அளித்துள்ளார். தனியார் துப்பறிவாளர்களை மூலமாக விசாரணையும் மேற்கொண்டு வருகிறார். அதன் முடிவுகளுக்காக காத்திருப்பதாகவும், அதன்பின் முக்கிய முடிவை அறிவிக்கலாம் எனவும் அவரது தரப்பினர் கூறுகின்றனர்.
“விவகாரத்தை பெரிதாக்க வேண்டாம்” – குடும்பம் கேட்டுக்கோள்
சமாதானம் சுமுகமாக நடைபெற்றுவரும் சூழலில், ஒட்டுக்கேட்பு விவகாரத்தை பெரிதாக்க வேண்டாம் என குடும்பத்தினர் ராமதாசிடம் கேட்டுக் கொண்டதாகவும் கூறப்படுகிறது.
