திண்டுக்கல் மாவட்டம் சாணார்பட்டி அருகே வேலை தேடி வந்த வடமாநில வாலிபர் ஒருவர், ஊர் பொதுமக்களின் அச்சத்தால் ஏற்பட்ட மன உளைச்சலில் காவல் நிலைய மொட்டை மாடியில் ஏறித் தற்கொலை மிரட்டல் விடுத்த சம்பவம் பெரும் பரபரப்பை ஏற்படுத்தியுள்ளது. இறுதியில் காவல்துறையினர் மற்றும் தீயணைப்புத் துறையினரின் சாதுர்யமான நடவடிக்கையால் அந்த வாலிபர் பத்திரமாக மீட்கப்பட்டு, அவரது சொந்த ஊருக்கு அனுப்பி வைக்கப்பட்டார்.
ஒடிசா மாநிலத்தைச் சேர்ந்த கோவிந்த கல்சா (35) என்ற வாலிபர், பிழைப்பு தேடித் தமிழகத்தின் திருப்பூர் மாவட்டத்திற்கு வந்துள்ளார். அங்குப் போதிய வேலை கிடைக்காத விரக்தியில், பேருந்து மூலம் திண்டுக்கல் வந்து பின்னர் சாணார்பட்டியை அடுத்த கோணப்பட்டி பகுதிக்குச் சென்றுள்ளார். கடந்த மூன்று நாட்களாகப் போதிய உணவும், தங்குவதற்கு இடமும் இன்றி அந்தப் பகுதியில் சுற்றித் திரிந்த கோவிந்த கல்சாவைச் சந்தேகமடைந்த பொதுமக்கள், கடந்த ஜூன் 1-ம் தேதி பிடித்துச் சாணார்பட்டி போலீசாரிடம் ஒப்படைத்தனர். அப்போது மனிதாபிமான அடிப்படையில் அவருக்கு உணவு வாங்கித் தந்த போலீசார், அவரைச் சொந்த ஊருக்குச் செல்லுமாறு அறிவுறுத்திப் பேருந்தில் ஏற்றி அனுப்பி வைத்தனர்.
ஆனால், கையில் போதிய பணம் இல்லாததாலும், மொழியறியாத அச்சத்தினாலும் அவர் ஊருக்குச் செல்லாமல், அன்று இரவு கோணப்பட்டி பேருந்து நிறுத்தம் அருகே உள்ள ஒரு அடகு கடையின் முன் தங்கியுள்ளார். நேற்று காலை அவரைப் பார்த்த அந்தப் பகுதி மக்கள், திருட வந்த நபர் எனத் தவறாகக் கருதி அவரைப் பிடிக்க முயன்றுள்ளனர். இதனால் பீதியடைந்த கோவிந்த கல்சா, மீண்டும் பாதுகாப்புத் தேடிச் சாணார்பட்டி காவல் நிலையத்திற்கு ஓடி வந்து தஞ்சமடைந்தார். அங்குச் சென்றவுடன் யாரும் எதிர்பாராத விதமாக, காவல் நிலையத்தின் மொட்டை மாடிக்குச் சென்று அங்கிருந்து கீழே குதித்து உயிரை மாய்த்துக்கொள்ளப் போவதாக இந்தியில் கத்திக் கூச்சலிட்டார்.
சம்பவம் குறித்துத் தகவலறிந்த திண்டுக்கல் தீயணைப்புத் துறையினர் விரைந்து வந்து, அவர் கீழே குதித்தால் அடிபடாமல் இருக்கத் தார்ப்பாய்களை விரித்துப் பாதுகாப்பு ஏற்பாடுகளைச் செய்தனர். சுமார் ஒரு மணி நேரப் போராட்டத்திற்குப் பிறகு, போலீசார் இந்தியில் பேசி அவரைச் சமாதானப்படுத்திப் பத்திரமாகக் கீழே இறக்கினர். விசாரணையில் அவர் வேலை கிடைக்காத விரக்தியிலும், மக்கள் தன்னைத் தாக்க வருவதாக எண்ணிய பயத்திலும் இத்தகைய முடிவை எடுத்தது தெரியவந்தது. இதையடுத்து அவருக்கு ஆறுதல் கூறிய போலீசார், அவரைத் திண்டுக்கல் ரயில் நிலையத்திற்கு அழைத்துச் சென்று ஈரோடு ரயிலில் ஏற்றிவிட்டனர். மேலும் ஈரோடு ரயில்வே போலீசாருக்குத் தகவல் கொடுத்து, அங்கிருந்து ஒடிசா செல்லும் ரயிலில் அவரைப் பத்திரமாக ஏற்றி அனுப்பி வைக்கும் வரை கண்காணித்துச் செயல்பட்ட சாணார்பட்டி போலீசாரின் மனிதாபிமான செயலைப் பொதுமக்கள் வெகுவாகப் பாராட்டி வருகின்றனர்.
