ராய்ப்பூர்: சத்தீஸ்கர் மாநிலம் பிஜாப்பூர் மாவட்டத்தில் நடைபெற்ற துப்பாக்கிச் சண்டையில் நக்சலைட்டுகள் 2 பேர் உயிரிழந்துள்ளனர்.
பிஜாப்பூர் காட்டுப் பகுதியில் நக்சலைட்டுகள் பதுங்கியிருப்பதாக கிடைத்த தகவலினைப் தொடர்ந்து, சிறப்பு அதிரடிப்படை, மத்திய ரிசர்வ் போலீஸ் படையின் கோப்ரா பிரிவு, மற்றும் உள்ளூர் போலீசார் இணைந்து தேடுதல் வேட்டை நடத்தினர்.
அப்போது நக்சலைட்டுகள் பாதுகாப்பு படையினரை தாக்கியதால், ஏற்பட்ட துப்பாக்கிச் சண்டையில் 2 நக்சலைட்டுகள் சுட்டுக்கொல்லப்பட்டனர். இன்னும் அப்பகுதியில் சண்டை நீடித்து வருவதாகவும், பாதுகாப்பு அதிகரிக்கப்பட்டுள்ளதாகவும் போலீஸ் தெரிவித்துள்ளது.
தகவலின்படி, இந்த ஆண்டு மட்டும் சத்தீஸ்கரில் பல்வேறு மோதல்களில் 243 நக்சலைட்டுகள் கொல்லப்பட்டுள்ளனர். குறிப்பிடத்தக்க வகையில், நேற்று கரியாபான்ட் மாவட்ட வனப்பகுதியில் நடைபெற்ற துப்பாக்கிச் சண்டையில் மூத்த நக்சல் பாலகிருஷ்ணா உள்பட 10 நக்சலைட்டுகள் உயிரிழந்திருந்தனர்.
