கன்னியாகுமரி : கன்னியாகுமரி மாவட்டம் குலசேகரம் அருகே காதலியின் வீட்டில் இளைஞர் மர்மமான முறையில் உயிரிழந்த சம்பவம் பரபரப்பை ஏற்படுத்தியுள்ளது. இச்சம்பவம் தொடர்பாக பாஜக மாநிலத் தலைவர் நயினார் நாகேந்திரன் கடுமையான குற்றச்சாட்டுகளை எழுப்பியுள்ளதோடு, உரிய விசாரணை வேண்டும் என வலியுறுத்தியுள்ளார்.
குலசேகரம் அருகே கல்வெட்டாங்குழி பகுதியைச் சேர்ந்த முகமது அலியின் மகளான சபீனா, கல்லூரியில் படித்து வரும் மாணவி. பள்ளி நாட்களிலேயே காவுவிளை பகுதியைச் சேர்ந்த தனுஷ் என்பவருடன் அவருக்கு காதல் தொடர்பு ஏற்பட்டது. ஆனால் சமீபத்தில் சபீனாவின் திருமணத்திற்கான ஏற்பாடுகளை பெற்றோர் செய்து வந்த நிலையில், தனுஷ் திருமணத்திற்கு சம்பந்தக் கேட்க முனைந்ததாக கூறப்படுகிறது.
இதற்கிடையில் சபீனாவின் பெற்றோர் திருமணத்தை நிராகரித்ததாக கூறப்படுகிறது. இதனால் மனமுடைந்த தனுஷ், நேற்று இரவு காதலியின் வீட்டுக்குச் சென்று மாடியில் தூக்கிட்டு தற்கொலை செய்துள்ளார் என கூறப்படுகிறது. இது குறித்து தகவல் பெற்ற குலசேகரம் போலீசார் சம்பவ இடத்துக்கு விரைந்து சென்று உடலை கைப்பற்றி பிரேத பரிசோதனைக்காக நாகர்கோவிலிலுள்ள அரசு மருத்துவக் கல்லூரி மருத்துவமனைக்கு அனுப்பி வைத்துள்ளனர். மேலும் வழக்குப்பதிவு செய்து விசாரணை நடத்தி வருகின்றனர்.
இந்நிலையில், இச்சம்பவம் தொடர்பாக பாஜக மாநிலத் தலைவர் நயினார் நாகேந்திரன் தனது சமூக வலைதள பக்கத்தில் கருத்து வெளியிட்டுள்ளார். இதில்,
“தனுஷ் பட்டியல் சமூகத்தைச் சேர்ந்த இளைஞர். மாற்று மதத்தைச் சேர்ந்த பெண்ணை காதலித்து திருமணம் செய்ய முயன்ற அவர், மர்மமான சூழலில் காதலியின் வீட்டில் தூக்கில் தொங்கிய நிலையில் சடலமாக மீட்கப்பட்டுள்ளார். இது சந்தேகம் உருவாக்குகிறது,” எனத் தெரிவித்துள்ளார்.
மேலும், அந்தப் பெண்ணின் குடும்பத்தினருக்கும் ஆளும் திமுகவுக்கும் நெருங்கிய தொடர்புகள் உள்ளதாகக் குற்றஞ்சாட்டிய அவர்,
“திமுக அரசின் கீழ் சட்டம் ஒழுங்கு பலவீனமடைந்துள்ள நிலையில், இந்த வழக்கில் அரசியல் தலையீடின்றி முறையான விசாரணை நடைபெற வேண்டும். பிரேத பரிசோதனை நியாயமாக நடத்தப்பட வேண்டும். பாதிக்கப்பட்ட இளைஞரின் குடும்பத்திற்காக பாஜக உறுதியாக நிற்கும்,” என்றும் அவர் தெரிவித்துள்ளார்.
சம்பவம் தொடர்பான விசாரணை நடைபெற்று வரும் நிலையில், இது இன, மத, அரசியல் அம்சங்களை கொண்டுள்ள தீவிரமான விவகாரமாகக் மாறியுள்ளது.