முன்னாள் எம்.பியும், தொழிலாளர் நலத்துறை அமைச்சருமான அன்வர் ராஜா, அ.தி.மு.க.வில் இருந்து நீக்கப்பட்டதையடுத்து, தி.மு.க.வில் இணைந்தார்.
அ.தி.மு.க.வின் சிறுபான்மை பிரிவு மாநில செயலாளராக இருந்த அன்வர் ராஜா, 2021ஆம் ஆண்டு கட்சியில் இருந்து நீக்கப்பட்டார். பின்னர் மீண்டும் அக்கட்சியில் இணைந்திருந்த அவர், தற்போது அமைப்புச் செயலாளர் மற்றும் முன்னாள் எம்.பி. பதவிகளிலிருந்தும் நீக்கப்பட்டுள்ளார். இந்த உத்தரவை அ.தி.மு.க. பொதுச்செயலாளர் எடப்பாடி பழனிசாமி பிறப்பித்தார்.
2019ம் ஆண்டு முதல், பா.ஜ.க கூட்டணியை பற்றிய தனது விமர்சனங்களை அன்வர் ராஜா தொடர்ந்து தெரிவித்துவருகிறார். பா.ஜ.கவுடன் மீண்டும் கூட்டணி வைத்ததற்கு எதிர்ப்பு தெரிவித்த அவர், “தமிழகத்தில் பா.ஜ.க ஒரு போதும் காலடி பதிக்க முடியாது” என்றார். இந்தக் கருத்து, அ.தி.மு.க.–பா.ஜ.க கூட்டணியில் மாறுபட்ட எண்ணங்களை உருவாக்கியதாகக் கூறப்படுகிறது.
இந்நிலையில், சென்னையில் தி.மு.க. தலைமையகமான அண்ணா அறிவாலயத்திற்கு சென்ற அன்வர் ராஜா, முதல்வர் மற்றும் தி.மு.க. தலைவர் மு.க.ஸ்டாலினை நேரில் சந்தித்து தி.மு.க.வில் இணைந்தார். அவரின் திரும்பும் முடிவு, மாநில அரசியல் வட்டாரத்தில் முக்கிய மாற்றமாக பார்க்கப்படுகிறது.
