அஞ்செட்டி: கிருஷ்ணகிரி மாவட்டம் அஞ்செட்டி அருகே நடைபெற்ற 13 வயது சிறுவன் கடத்தல் மற்றும் கொலை சம்பவம் பெரும் பரபரப்பை ஏற்படுத்தியுள்ளது.
அஞ்செட்டி அருகே உள்ள மாவநட்டி கிராமத்தைச் சேர்ந்த சிவராஜ் மற்றும் மஞ்சு தம்பதியினரின் இளைய மகன் ரோகித் (வயது 13) அங்குள்ள அரசு பள்ளியில் 8ம் வகுப்பில் படித்து வந்தார். நேற்று (செவ்வாய்) மாலை சுமார் 4 மணியளவில் மர்மநபர்களால் அவர் கடத்தப்பட்டதாக கூறப்படுகிறது.
இதுகுறித்து அவரது பெற்றோர்கள் உடனடியாக அஞ்செட்டி காவல் நிலையத்தில் புகார் செய்தனர். ஆனால், போலீசாரின் நடவடிக்கை தாமதமாக இருந்ததாகக் கூறி பெற்றோர் மற்றும் கிராம மக்கள் எதிர்ப்பு தெரிவித்தனர். இதில், கடத்தலுக்குப் பயன்படுத்தப்பட்டதாக கூறப்படும் கார் அருகிலுள்ள பெட்ரோல் பங்கில் நிறுத்தப்பட்டு இருந்தது கண்டுபிடிக்கப்பட்டது.
கடத்தப்பட்ட ரோகித் குறித்து தகவல் எதுவும் தெரியாமல் இருந்த நிலையில், இன்று (புதன்) காலை ஆத்திரமடைந்த உறவினர்கள் மற்றும் கிராம மக்கள் நூற்றுக்கும் மேற்பட்டோர், அஞ்செட்டி பேருந்து நிலையம் அருகே சாலை மறியல் போராட்டத்தில் ஈடுபட்டனர். “சிறுவனை கண்டுபிடித்து தர வேண்டும்” எனக் கோரிய அவர்கள், போலீசாரின் தூக்கங்கொள்ளும் நடவடிக்கையை வலியுறுத்தினர்.
இந்தநிலையில், போராட்டத்தின் போது, அருகிலுள்ள வனப்பகுதியில் சடலம் இருப்பதாக தகவல் கிடைத்தது. உடனடியாக போலீசார் மற்றும் போராட்டக்காரர்கள் அஞ்செட்டியில் இருந்து சுமார் 5 கி.மீ தூரத்தில் உள்ள கொண்டை ஊசி வளைவுக்கு சென்றனர். அங்கு ரோகித்தின் சடலம் வீசப்பட்ட நிலையில் கிடைத்தது.
சடலத்தை கைப்பற்றிய போலீசார் விசாரணையை தீவிரமாக நடத்தி வருகின்றனர். சம்பவத்துடன் தொடர்புடையதாக சந்தேகப்படும் ஐந்து பேரை போலீசார் கைது செய்துள்ளனர். இந்த கொடூரமான சம்பவம் அஞ்செட்டி பகுதி மக்களிடையே பெரும் அதிர்ச்சியையும் கோபத்தையும் ஏற்படுத்தியுள்ளது.
