மதுரை உயர் நீதிமன்றக் கிளையில் தனி நீதிபதி ஜி.ஆர். சுவாமிநாதன் குறித்து உச்ச நீதிமன்ற மூத்த வழக்கறிஞர் விகாஸ் சிங் தெரிவித்த கருத்து, நீதித்துறை வட்டாரத்தில் பெரும் விவாதத்தைக் கிளப்பியுள்ளது. தன்னைப்பற்றி அவதூறாகப் பேசிய வழக்கறிஞருக்கு, நீதிமன்ற விசாரணையின் போதே நீதிபதி நேரடியாக விளக்கம் கேட்டு முட்டுக்கட்டை போட்ட சம்பவம் பரபரப்பை ஏற்படுத்தியுள்ளது.
திருப்பரங்குன்றம் மலைப்பகுதியில் தீபத்தூண் அமைப்பது தொடர்பான வழக்கை அண்மையில் விசாரித்த நீதிபதி ஜி.ஆர். சுவாமிநாதன், அதற்கு ஆதரவாகத் தீர்ப்பளித்திருந்தார். இந்தத் தீர்ப்பை எதிர்த்துத் தமிழக அரசு சார்பில் உயர் நீதிமன்ற இரு நீதிபதிகள் அமர்வில் மேல்முறையீடு செய்யப்பட்டது. கடந்த நேற்று முன்தினம் இந்த வழக்கு விசாரணைக்கு வந்தபோது, அரசுத் தரப்பில் ஆஜரான உச்ச நீதிமன்ற மூத்த வழக்கறிஞர் விகாஸ் சிங், தனி நீதிபதியின் தீர்ப்பை விமர்சித்துப் பேசுகையில், “நீதிபதி ஜி.ஆர். சுவாமிநாதன் தேர்தலில் போட்டியிடத் தயாராகிக் கொண்டிருக்கிறார்” என்ற சர்ச்சைக்குரிய கருத்தை முன்வைத்தார்.
இந்நிலையில், நேற்று நீதிபதி ஜி.ஆர். சுவாமிநாதன் முன்னிலையில் வேறொரு நீதிமன்ற அவமதிப்பு வழக்கு விசாரணைக்கு வந்தது. அப்போது தமிழக அரசுக்காகக் காணொலி வாயிலாக வாதாட விகாஸ் சிங் முற்பட்டார். அவர் பேசத் தொடங்கிய உடனேயே குறுக்கிட்ட நீதிபதி சுவாமிநாதன், கடந்த சில நாட்களாக நாளிதழ்களில் வெளியான செய்திகளைச் சுட்டிக்காட்டி தனது அதிருப்தியை வெளிப்படுத்தினார்.
“நேற்று முன்தினம் தீபத்தூண் மேல்முறையீட்டு வழக்கின் போது, இரு நீதிபதிகள் அமர்வில் என்னைப் பற்றி நீங்கள் சில கருத்துக்களைக் குறிப்பிட்டுள்ளீர்கள். அதனை நாளிதழ்கள் வாயிலாக நான் அறிந்து கொண்டேன். ஒரு நீதிபதியின் செயல்பாடுகளைத் தனிப்பட்ட முறையில் விமர்சித்தது குறித்து உங்களிடமிருந்து எனக்கு விளக்கம் தேவைப்படுகிறது” என்று நீதிபதி கண்டிப்புடன் தெரிவித்தார்.
தொடர்ந்து விகாஸ் சிங் வாதாட முயன்றபோது, அதற்கு அனுமதி மறுத்த நீதிபதி, “தற்போது உங்களிடம் பேசுவதற்கு வாய்ப்பு வழங்க முடியாது. இந்த விவகாரத்தில் தமிழக அரசின் தலைமைச் செயலரின் கருத்து என்ன என்பதை நான் அறிய வேண்டியுள்ளது. அதுவரை நீங்கள் காத்திருக்க வேண்டும். உங்கள் ஆடியோவை உடனடியாக ‘மியூட்’ (Mute) செய்துவிடுங்கள்” என அதிரடியாக உத்தரவிட்டார்.
உயர்ந்த பதவியில் இருக்கும் ஒரு மூத்த வழக்கறிஞர், பதவியில் இருக்கும் ஒரு நீதிபதி அரசியல் உள்நோக்கத்துடன் செயல்படுவதாகத் திறந்த நீதிமன்றத்தில் பேசியதும், அதற்கு அந்த நீதிபதியே நேருக்கு நேர் விளக்கம் கேட்டதும் தமிழக சட்டத்துறையில் ஒரு முக்கிய நிகழ்வாகப் பார்க்கப்படுகிறது. இந்த விவகாரத்தில் தலைமைச் செயலர் அளிக்கப்போகும் விளக்கம் என்ன என்பது அடுத்தகட்ட எதிர்பார்ப்பை உருவாக்கியுள்ளது.
